林钰洧母含冤30年 怨林俊贤要女验DNA

etin

80年代当红小生林俊贤，其前妻Jasmine早前受访时曾提及他答应共同抚养当年只得8岁的林钰洧但最后失踪，对于早年被指家暴，Jasmine则不作回应。林俊贤日前却在社交平台发声，指自己当年不顾而去全因财困，至于“家暴”实则是“还手”，而Denice表姑姐Naomi亦留言力撑表哥林俊贤：“说谎的人要吞一千根针。”意指有人讲大话。

​对于连串是非，原本不想再受访的Jasmine，日前开腔逐一回应，谈到当年的家暴事件，她说：“我只系讲唔想回应，已经有咁大反应，佢用‘还手’作解释，系咪想索性扭曲事件反咬对方出手在先？事实佢应该好清楚，第一次动手，我哋讨论紧关于我一直要做佢‘影子女友’嘅问题，期间我用手推咗佢一下，只不过系一般女性做嘅动作，一啲都唔暴力，但佢就好大反应咁一巴掌打到我飞咗落床。我当时晕咗一阵，有番意识嗰阵觉得好痛，块面同头都好似想爆咁，整晚发烧，好痛。我喊咗成晚，第二日去睇医生，医生好严肃问我需唔需要写医生纸畀我报警，我觉得好尴尬，从来冇谂过呢啲事会发生喺自己身上，最后我攞咗药就走咗。”

她续说：“佢（林俊贤）之后睇到我个样肿晒，就唔敢再动手，但唔代表暴力事件冇再发生。同佢一齐5年，发现意外怀孕，当时佢工作走下坡，仲畀人话有躁狂症，佢就将啲不如意嘅事怪罪于我，嗰段日子佢已经成日闹我阻住晒，亦唔同意我要个BB，更唔信系意外，话我刻意怀孕绑住佢，仲话我唔会分到佢身家，要我做手术（堕胎）。我做唔出，亦冇要求结婚，系佢担心传媒有话柄，先话返英国签结婚证书。当时乜仪式同庆祝都冇，只系搵咗我爸爸做证婚人，所有嘢一个下昼搞掂。当时我已经好明白佢系一个咩人，但为咗keep住个BB，我所有嘢都配合佢，办妥结婚证书后，佢只同我爸爸讲咗一句：‘我请你饮杯嘢。’我谂番起都真系好心酸。”

她指暴力事件续有发生，Jasmine忆述：“囡囡出世未够10个月，呢次唔系净系同我嘈，佢黐线到队个头埋去BB床，贴住个女块面讲：‘起身啦！你唔好瞓呀，搞成咁，起身一齐讲呀！’至于最后一次，亦系我唔可以再容忍嘅一次，当时我哋住喺龙虾湾一间隐蔽嘅三层屋，冇工人，我好努力凑BB，打点家务同埋煮三餸饭畀佢喺工作房食，当时佢好颓废，行为开始变得奇怪，有几晚深夜攞住枝棒类嘅嘢由1楼拉到上3楼，上上落落，到咗第3晚佢喺厅度开到个speaker好大声，我忍无可忍问佢可唔可以唔好嘈住个女瞓，佢叫我收声，跟住挥棒想打我，我好惊，即刻返去同个女瞓嘅房锁门，执晒行李等天光走。呢次我要报警，因为好担心佢为咗阻止我哋，唔知会做啲乜嘢，当时有成20个警察过嚟，我只系要啲警察保护我同个女离开间屋。”

Jasmine重申受访只是将自己的过去说一遍，并没有对任何人有任何怨怼，因一切已成过去。不过，当看到应该要道歉的人只想用所谓的“语言艺术”来洗白，她就吞不下这啖气：“简单地承认同讲句对唔住都做唔到，仲要反咬别人？事实上，如果财政有困难可以直接讲，唔需要攞走囡囡照片后就冇下文，选择失踪，咁样对我哋两母女系‘二次伤害’。其实过咗咁多年，估唔到佢依然系一个糊涂汉、狗男人！我知道佢同Denice喺15岁见番面时，佢要求个女验DNA，我觉得真系对我一个极大侮辱！当年我同佢一齐，成日要匿喺邵氏宿舍度唔见得光，呢啲过去佢好清楚，点解会有验DNA呢个想法？依家Check咗系佢个女，佢会唔会觉得好惭愧？”她慨叹暴力事件在社会上时有发生，有第一次自然会有第二次，她明白第一次遇到时应该要走，但她没有，觉得自己很傻。