林钰洧母提共同抚养 林俊贤倾完冇影

etin

港姐冠军林钰洧母亲Jasmine首度开腔接受专访，单亲妈妈不易当，她坦言女儿8岁时家逢变故，跟前夫林俊贤提出共同抚养女儿，对方原本应承，但最后却没有回音，令两母女挨过一段艰辛的日子。如今女儿攀上人生高峰，一直陪林钰洧走过这段选美路的她当然高兴，现时最希望女儿忙完工作后好好相聚，分享当港姐冠军的喜悦！

​应届港姐冠军林钰洧（Denice）母亲Jasmine，是80年代当红小生林俊贤的前妻，当年两人秘密拍拖、结婚及诞女，离婚后Jasmine独力抚养女儿。30多年来，她未有接受媒体访问。日前她接受专访，对于Denice成为港姐冠军，她当然非常高兴。谈到跟女儿相依为命的日子，她坦言不容易，尤其女儿8、9岁时出现一个重大关口：“因为Denice公公当时由英国返嚟香港帮我手凑囡囡，但当囡囡8、9岁左右，公公突然离世，唔可以再照顾佢，令到我真系要好好咁样谂吓嚟紧嘅日子，当时我做紧广告Styling嘅工作，但都系freelance，我知道如果要全职凑小朋友，呢个方向系唔再可行！我最后去搵林俊贤，叫佢嚟我哋屋企，倾共同供养女儿，当晚嘅气氛好和谐，我仲畀佢睇我同Denice影嘅相，佢想攞一张去keep，我话yes，当晚大家喺同意我嘅提议之下讲晚安，然后话过几日再讲，但系之后我都搵佢唔到。（当年你离开林俊贤，系咪同早年传你被佢家暴有关？）呢个我唔想回应！总之自从嗰晚之后，我就真真正正彻彻底底将佢removed from my mind，冇再谂佢亦都冇嬲，只知要将重点放喺Denice嘅生活。”

对于Denice曾自爆13岁时需要独立及住劏房，Jasmine表示：“其实我咁多年都冇接受过任何访问，因为我想低调、安静、安全凑大个女。今次受访原因，就系想澄清坊间一啲误会。”她指女儿小时候很听话，好容易就满足，不过自从女儿升中学认识不少家境富裕的同学，便觉得有比较：“记得有一日，佢13岁左右，返到嚟屋企带住好震撼同好失望嘅神情，同有少少审问嘅态度问我‘点解我哋住喺呢度咁细嘅地方？点解人哋父母会有车揸？’”Jasmine没想过女儿会提出这种问题，故不懂回应：“咁多年搬屋都系自己搞装修、铺地毡，希望畀个女有舒适嘅家，亦试过抱个女行好多层楼梯返屋企，好多嘢都喺脑海度涌上嚟！自从佢睇到出面嘅世界后，就对我有意见同不满！佢13岁去帮人补习，呢啲我都唔知，直至佢喺湾仔搵咗一份兼职做侍应，因为佢有啲事，两个星期唔能够返工先同我讲，想我去顶更，嗰阵时我先知佢做紧嘢。虽然嗰阵我已经40岁，做紧美指，但我觉得为咗生活去工作，系一种生存之道，所以我冇任何抗拒，即刻应承咗。”

她表示之后Denice提出想跟几位女仔朋友搬出去住，由于知道女儿心意已决，故无奈答应。她强调绝无要求女儿独立，往后两母女不时见面，直至Denice签了模特儿公司，她们才疏于联络，Jasmine表示：“当时我真系好难搵佢，个心好似吊起咗咁，成日好挂住佢。直至3年后佢同模特儿公司完约，先开始密番联络。”

今年Denice参选港姐，两母女关系变得更好。Denice经常向母亲请教选美心得，因知道母亲曾跟一班港姐合作，Jasmine亦倾囊相授：“Denice系一个冇乜信心嘅女仔，所以我成日教佢要保持自信嘅微笑，当佢得奖一刻，我非常之开心。佢曾经讲过好想攞个后冠返屋企，可惜佢可能太忙，我到依家都未见到佢嘅后冠。我知佢当选后被好多人攻击，令佢好大压力，同埋佢要专心做好港姐工作，所以暂时未有时间见我，但我会耐心等佢攞后冠返嚟，一定会系一个magic moment。”