林峯上海设宴为女庆生 爆阿女恨做家姐揭造人进度

etin

林峯昨日（26日）现身月饼活动，吸引逾百人冒晒围观，而穿上西装外褛的林峯热到满头大汗，抵受高温赚辛苦钱。林峯谓每年中秋多数在工作中度过，而他将于9月开始展开为期4个月的世界巡回，故今年也会在工作中过节，又谓超锺意食月饼，曾一晚自队六黄月饼，大会即安排他试食多款口味月饼。他接受访问时表示抱恙中，有点咳嗽及喉咙敏感，稍后睇医生免影响30号举行的拉阔音乐会，之后再返上海家陪妻女一周，才展开世界巡回走遍内地及美加，但不会带妻女同行，他说：“第一站喺广州，中秋就喺大湾区开骚，工作中过中秋系好事。（妻女会陪过中秋？）因为囡囡喺上海已经开学，中秋冇假放，同埋得嗰1，2日骚，唔想佢飞嚟飞去，有2至3个星期喺美加。（咁4个月冇得见妻女？）唔会日日做嘢，有时间咪飞返去啰。（只陪1周，囡囡可会不满？）唔会，我啱啱喺上海飞返嚟。”

谈及之前和囡囡在上海庆祝5岁生日，他说都觉得时间过得快，当日安排了囡囡的同学及其家长在游乐场玩了一个下午，晚上再设宴，他就负责陪玩及入席安排，他说：“我同老婆要排嘉宾位都几头痛。（由朝忙到晚，做父母真辛苦？）enjoy嘅，最紧要小朋友开心，你知啦，有啲家长群组，但啲家长都系当我普通家长身份，冇叫我攞飞，但如喺上海开骚都会请啲家长去嘅。”他又谓没特别再买礼物送女，觉得小朋友最需要父母精神上支持，问囡囡可要求要弟妹做礼物？他就话：“我哋叮嘱佢读好书先，我同老婆顺其自然去安排，佢都恨做家姐，呢啲好正常，希望小朋友多个亲人。（锺意弟或妹？）佢一时一样，有时想要细佬畀佢指挥，又时又想要妹妹同佢玩。（要生龙凤胎喎？）呢啲要睇遗传基因。”