张振朗入行月入6千感激家人支持 与女友杨偲泳互相催旺事业

etin

视帝张振朗近日接受电台节目访问，他坦承及至2015年主演《爱．回家》第二辑之后才开始有稳定收入，问到如何挨过初入行月入6千元的岁月，他说：“凌晨将军澳收工最辛苦，要公司车去旺角转红van，再返到屯门仲要行好远先至到屋企。起居饮食系唔够，好记得当时沈震轩带我食日本拉面，我一望餐牌，咁贵点算？或者佢睇穿我，话：‘我请你啦！’又有一次同朱敏瀚、乐彤一齐出去食嘢，又系见到菜单好贵，佢哋都系讲咗一句‘我请你啦！’系好记得呢啲画面。当时连冻饮加两蚊都唔够胆，事关第二日食饭可能就系争呢两蚊。”未有稳定收入时，振朗直认要靠家人支持：“阿妈阿哥都有，阿妈帮得最多。一定有唔好意思，都廿到尾大个仔。阿妈系无限量支持我，但都有阶段问我需唔需要考虑将来转行，但当佢知道我好想继续演戏呢个谂法，都系继续无条件支持我。因为冇人估到近5年我嘅转变，所以都会担心我，但起码到今日，冇令阿妈失望。”

6年前振朗曾被封为“地狱黑仔王”，事因他接连5套主演剧临播出街被抽起，拍剧亦多次受伤，当中甚至有两次需即时送院急救，他直言难以忘记，当黑的他当时正在拍摄《反黑路人甲》：“嗰几次受伤系好恐怖，嗰啲剧系朝早话播，到晏昼又唔播。嗰个阶段，都会谂系个天觉得我唔啱呢行？好彩我乐观，都会认为自己好彩！会谂如果啲剧当时播，或者会畀人闹到反艇喎？嗰两次严重意外，如果我真系黑仔，有可能瓜咗喎？个cam跌落嚟嗰次，有可能毁容喎？好彩只系中膞头！令我知道凡事往好方面睇，好嘢自然会埋嚟。”振朗与女友杨偲泳拍拖至今6年，由相恋至今二人事业齐有突破稳步上扬，就连振朗也认同与女友互相催旺事业：“我哋摆明运气夹，直情系护身符咁，哈！”他指两人关系稳定但不急于结婚：“我系好传统嘅人，当然想会想做呢件事，依家关系好舒服，但要等多一阵，因为我同佢都冲刺紧。我哋系好Chill嗰种，突然之间听日做都唔出奇。”他指入行至今的目标，仍是希望储够钱置业，买一间可以容纳8个人同住的独立屋与家人一起生活。