艺人黎诺懿昨日(6日)为儿童广播剧录音,当被追问“百万续约无綫”消息,他未有否认,但笑言:“有冇睇网民留言?除番开都系每个月4万几,我真系好抵用㗎!”记者取笑他荣升高层,他说:“做生不如做熟,况且呢2年我都开始咗监制嘅工作,佢哋觉得我咁锺意,咪继续啰!(曾志伟同你倾?)系乐小姐先啱,佢话畀我试,咁我做咗演员咁耐,同埋之前都试过监制咗4个节目。(取代C君位置?)位高权重唔啱我,千祈唔好,做番自己就得。(首个节目咩题材?)未知,都系讲紧明年先成事,有个节目我好想做,要同志伟倾,暂时保密,另外就系《满足的味道2》。(唔系《慈善星辉仁济夜》你监制咩?)未收到消息,大骚系直播,等公司安排。” ​问到诺懿有否兴趣染指剧集监制,他说:“监制兼顾嘅嘢实在太多,Budget大好多,又要理演员档期,剧本都要管埋,我反而有兴趣做剧集导演,唔排除嘅。”他又自爆首次监制节目,曾“蚀钱”收场:“个客畀咗Budget你,超支要自己负责,当时我蚀咗10几万,咪当打麻雀交学费啰,所以要学识理财,依家开始识䵝点做嘞。(Call车啲钱点处置?)交返公司,应该畀番个客啩,上市公司冇理由自己袋落袋嘅,坦白讲依家拍剧同综艺,已经好难做到收支平衡,经济环境唔系咁好嘛!”
|