|
艺人陈敏之每日都会做柴可夫,揸车接送囝囝返学,日前佢送完囝囝返学,咁啱见到有学生卖旗筹款,佢就将车停低谂住日行一善支持吓,敏之喺社交网上载片段同留言:“一早起身送完仔仔返学,见到一班师弟师妹在街上卖旗筹款,身为师姐嘅我就梗系要支持下佢哋,呢位师妹好醒目又得意,你哋加油,筹多啲款。”原来咁啱遇到师弟师妹,敏之仲绞低车窗同小师妹倾咗几句,读紧小学嘅小师妹精灵又有礼貌,十分可爱,敏之买旗后叫小师妹帮佢贴喺手臂,又祝小师妹加油同学业进步,小师妹就好有礼貌咁讲咗句多谢。圈中好友袁伟豪同陈自瑶即畀心心兼赞小师妹可爱,不过亦有网友留言质问:“应该戴番个口罩保护其他人”、“点解唔戴番好个口罩落车买旗”,更加有网民畀晒嬲留言:“唔戴口罩,有冇谂过小朋友好危险?你自己都有小朋友,点样可以连最基本嘅卫生意识都冇”。敏之就留言解释当时喺自己架车入边冇为意,亦承诺下次会记得戴番口罩。
|
|