艺人罗子溢系廿四孝老公兼好爸爸,自从太太杨茜尧为佢诞下一对仔女后,佢除落力搵奶粉钱外,公馀时间就全部畀晒仔女,连前日(28日)佢38岁生日,仲要系机会难得西历同旧历生日撞正同一日嘅“双牛一”大日子,佢都继续乐于做凑仔公,一家四口玩水中度过,凡事以小朋友行先,认真伟大,佢留言笑指:“今日系咩日子呢?家庭乐嘅日子,炎炎夏日最好嘅娱乐,快乐就系咁简单,旧历新历同一日,19年一遇。”老婆杨茜尧即送上祝福:“Happy birthday 我家大人!祝你身体健康,一直一直咁靓仔,一直一直咁有型,一直一直咁开心!”
​罗子溢接受访问,透露拍毕《婚后事》后至年尾先再开剧,刚过完生日,就即为囡囡“小珍珠”开学做足准备,添置白波鞋等上学物品,佢表示:“其实咁大个人,依家生日简简单单过就算,主要都系凑仔凑女紧要啲,因为佢哋大得好快,生日愿望最想仔女开开心心、健健康康、听教听话。”佢又指现时为仔女成长问题感烦恼,阿仔唔肯瞓,阿女就唔愿食,吸收唔到足够营养,所以要多陪囡囡放电,希望佢更有胃口进食,笑言陪玩仲忙过返工,又庆幸能有时间能与仔女朝夕相处,不错过其成长嘅珍贵时刻。
|