离婚后寄情工作 赵丽颖博到尽严寒开工惨变雪条

etin

女星赵丽颖自从同“富二代”男星冯绍峰离婚后更醉心工作，日前有网民遇见佢喺冰天雪地嘅哈尔滨赶拍新剧《野蛮生长》。嗰日佢着咗毛毛帽大褛，一身东北人打扮，同工作人员企喺街头等埋位，斋睇相都知佢冻到变雪条咁滞，不过佢一啲都冇呻辛苦，仲唔会因为佢系“女一”，而要匿埋喺车度自己避寒，一于同剧组齐上齐落，有冻一齐受，一啲明星架子都冇。

终于挨到收工，难得嚟到咁靓嘅哈尔滨，佢食完饭都唔返酒店休息住，换咗件白色羽绒褛做游客，去咗教堂“打卡”，仲走去试食果脯串成嘅冰糖葫芦，不过啲网民就话佢个样比冰糖葫芦更甜。据知同佢饰演情侣嘅男星李光洁已经拍晒自己嘅戏份，影完张大合照就可以走人，但赵丽颖就要继续开工，相信佢有排都冇假放，未有机会去旅行休息。