平安夜最危险？卫诗雅忽然大腿缝5针

etin

前日（24日）系一年一度平安夜，大家都为迎佳节成晚狂欢，点知英皇艺人卫诗雅喺呢晚真系唔平安喇，因为佢晒出多张现身医院嘅相，见到佢大腿多咗一大条血痕，仲自爆已经缝咗针：“平安夜大家一定要平安啊！唔好好似我咁无端端大髀要缝四针😅 ”吓到网友嗌出嚟。

相中见到佢个伤口一大条𠝹喺脚上，睇见都痛，但都无损佢去Party嘅心，虽然缝完针要贴上大大块纱布，不过佢都依然换上短裙仔去玩，仲大方晒出纱布影相“留念”，不过佢最担心嘅都系会留疤，睇嚟佢真系要小心处理个伤口喇。

事后卫诗雅接受访问时，自爆受伤原因：“因平安夜食饭，同妈咪讲住电话又赶住出门口，冇为意铁笼有支尖铁凸咗出嚟，结果刮亲大髀，当时好痛同埋伤口好深，皮都翻埋出嚟，就去医院睇。原本都系谂住洗伤口同埋打破伤风针，点知医生话要缝针，原本话2针，最后仲缝咗5针，因为医生知我唔想留疤，缝5针伤口会埋得靓啲。”