张秀文教堂行礼 “媒人”林盛斌见证

etin

34D无綫咪神张秀文上月晒出婚照报喜，宣布嫁“皮草太子爷”王大业堂弟、现年30多岁嘅金融才俊王大权（Billy），原来话咁快大喜日子已到。昨日（23日）好友林盛斌（Bob）上载与一对新人于教堂前影嘅合照，留言写道：“又搞掂一单！恭喜恭喜！”张秀文之所以认识到依家嘅老公，系多得“金牌媒人”Bob撮合，难怪呢位媒人咁戥佢哋高兴！作为新娘子嘅张秀文就未有更新社交网，唔少网民纷纷留言送上祝福。

“媒人”收新郎哥利是

Bob回覆表示：“今日系好开心嘅，见到佢哋有情人终成眷属，同埋要好多谢佢哋特别安排，完咗签字仪式之后，佢哋喺教堂入面同屋企人合照，影完两张最重要嘅男家女家之后，主持人开咪叫我上去单独同佢哋影，突然之间觉得自己地位好崇高，哈哈！成个过程都好感动，特别系佢哋讲誓言嘅时候，我都眼湿湿！最好笑嘅系佢哋嘅爸爸妈妈同亲戚不断咁同我讲多谢，有两个亲戚仲问我有冇笋盘介绍畀佢个女！仲有新郎哥实在太客气，我都畀佢吓一吓，无啦啦塞咗封利是我，我话唔使搞呢啲嘢，推推拉拉咗一轮，佢话一定要收，啲宾客又喺度望住，搞到好鬼尴尬，哈哈！总之衷心祝福佢哋幸福快乐，快快脆脆生几个小朋友啦！”