《倒转地球》热爆 陶大宇困惑：唱得好就冇咁红

etin

“师奶杀手”陶大宇最近凭演唱《倒转地球》，大骚宇宙级唱腔及“水拨式”台风爆红，升呢“陶宇宙”人气一时无两，身在广州工作嘅佢近日接受无綫娱乐新闻台访问，大谈爆红一事，佢笑言对此感到迷惘：“究竟我仲应唔应该将啲歌唱得更加好呢？如果我唱得咁好嘅话，我就唔会有今日嘅成就。你究竟锺意我边一瓣先？你究竟锺意我依家呢个版本，抑或要一个我将来进步一啲嘅版本先？咁我都会尽返好我自己嘅责任嘅，唔会太过离谱嘅。其实我唱歌呢，唔系咁难听嘅，唔系依家市面上咁样嘅，我真系要澄清一下，我都想唱得好少少嘅，唔好令到大家有啲不必要嘅误会啦。”

讲到佢将《倒转地球》唱到街知巷闻，甚至有唔少人以为佢先系原唱，佢笑指当初并冇谂过会有咁嘅效果：“真系唔好意思，搞到首歌咁样，咁我觉得喺现场唱歌，个反应系直接嘅，我好想做一个互动嘅感觉，所以我就设计咗一个打招呼咁样唱，点知挥下挥下，姿势打下打下又几过瘾喎，愈打就愈劲，出现咗呢个效果喇。开头我都唔知系咁搞笑，睇返好多片先知原来真系好搞笑，又真系几似嗰个水拨嘅，开心就得啦，最紧要开心。”佢又透露最近工作量大增，商演活动接唔停，工作排到明年先能够返港，希望农历新年能回家与妈妈食团年饭。

而《倒转地球》热潮继续持续，连无綫艺人黎诺懿及“长腿女神”戴祖仪都拍片翻唱，跟上潮流。