罗子溢3度“行医” 同马国明淡定斋坐唔抄Notes

etin

艺人罗子溢喺无綫热播剧《星空下的仁医》入面饰演医生，因为新剧以儿科为主题，少不免要唔同小演员“打交道”，但对升呢做咗爸爸嘅子溢简直系a piece of cake！面对小演员零舍有种父爱，佢笑话同郑嘉颖一样，耐性好咗好多：“以前多数凼小演员系假手于人，交留畀导演、佢嘅妈妈，但做咗爸爸之后多咗耐性去亲力亲为，会同小朋友沟通咗先。”

佢仲分享咗个凼B招数，就系要将自己都变做BB：“代入番佢个情绪，扮低能同佢玩，然后抱佢手法要舒服，呢啲嘢要慢慢累积，到你真系做爸爸嘅时候，有好多技能就好自然会识！”有冇趁机会抄医生牌？佢笑话早喺拍《On Call 36小时》就抄咗，但希望唔会有用得着嘅一日，又大爆老婆杨茜尧系紧张妈妈：“小朋友嘅嘢佢会比我着紧100倍，我系帮手而佢系主力。”

讲到剧中有唔少手术场口，子溢笑话可能因为已经系第3次“行医”，所以冇乜太大嘅新鲜感，又爆笑讲自己同马国明系最老定：“其他人都系第一次饰演医生冇乜经验，当有医生嚟讲解所有流程、器材嘅时候大家都好认真抄Notes，又会好紧张问医生啲字都点读，我同马国明就斋坐咗喺度，拍过几次化晒！到时拍都会有专业医生在场，佢哋可能会临场加减、纠正发音逐样执，所以我哋两个好老定，好懒咁连笔记都唔抄，哈哈！”