单亲家庭影响大 李璧琦同老公闹交要见心理辅导

etin

歌手李璧琦（Becky）今年用自己血汗钱自资做歌，她从未放弃过唱歌梦想，她笑说：“如果喺演戏里面乾渴咗，我喺音乐就会得到滋润。”单亲家庭长大的她从来不知道有受屋企的影响，小时候的她好少会笑，十几岁见她藐咀藐舌，以为是反叛青春期，到她长大后才知原来她心里面一直不开心，她一直不是笑脸迎人的小朋友，只会专心唱歌，因为音乐能将她带到去第二个世界。

璧琦表示从少就不会同人沟通，也习惯少说话，她记得屋企永远好安静，直到她做婚前辅导，辅导员表示要将心里面的包袱舍下，更有助婚姻顺畅，当时才发现好多唔记得的事慢慢浮面，原来小时候屋企嘅事一路影响住她，甚至以为是自己做错了。印象最深是10岁大时，屋企人答应她默书攞100分，就全家一齐去主题公园玩，结果她真的考到满分，当日她好兴奋准备出发，点知发现爹哋仲未准备好，原来前一晚父母嗌完交，两人在斗气，结果再次嘈交，愈闹愈大声，最后一个冲出去，一个在房内大喊，已打定输数冇得去，她说：“当时系好惊，一直唔知道系佢哋自己有问题，以为因为自己要去而发生呢件事，所以我成日都有个内疚感喺入面。”

所以当她唱完《记忆的碎片》，她觉得有个使命，想话畀大家知，结婚之前要思考多啲，因为呢个承诺系一世，她说：“假如你对婚姻嘅信心未系咁大，而有咗小朋友，可能下一个遇到困难，就系你嘅小朋友，就好似当时嘅我咁。”所以结婚时她跟丈夫商量过，暂时都不会考虑生B：“我哋谂法好相同，我哋都系好认真嘅人，如果我要带呢个生命嚟冒呢险，我系未有嗰个勇气。”

她坦言婚前跟老公都有过暗涌，她说：“有次嗌得好犀利，佢好大声，我就好惊，突然之间惊到个心去番之前屋企发生嗰种声音，好怪嘅恐惧笼罩住我，我要离开间屋，我惊到去咗酒店住咗一个礼拜，系做过辅导之后，先知一听到嗰啲声音，做番‘小璧琦’嘅恐惧，原来两人建立嘅关系，对下一代系有一生嘅影响。”老公点凼番你？她笑说：“佢畀好多空间我，畀啲安静先再约我倾，佢明白咗我嘅恐惧，学习讲嘢细声啲，好感恩佢包容到我呢啲性格、成长嘅缺陷。”