选港姐3件最老尴事件 谢嘉怡亲自解释

etin

前港姐冠军谢嘉怡好识运用社交平台，连广东话都讲唔正嘅佢踩入内地视频网站，上载自拍片段，不过佢仲系用英文做旁白，睇嚟佢要再多啲用吓广东话先得喇，虽然系咁，佢率直又纯真嘅性格就大受网友欢迎！谢嘉怡讲到当日参选港姐，虾碌事件百出，佢逐一解释番当日情况同埋感受，第一就系“比赛未结束就落台”，当日夺得冠军嘅佢连个后冠都戴歪咗，节目未完就落台，最后系由郑裕玲（Do姐）叫番佢去台中间，佢就解释当时系有彩排呢一幕，但因为太多嘢要记，佢都冇认真去听，一心谂住快啲放饭，而佢都冇谂过自己拎冠军，所以到佢真系拎冠军时，就唔记得晒啲走位！

第二“感言环节竟然笑场”，呢个环节必然系一班港姐喊晒嘅时刻，但谢嘉怡唔单止冇喊，当佢讲到佢未识行时，爸爸就想佢参选港姐，即刻搞到台下评判及观众笑晒，佢就解释佢当时系唔想笑，但系见到台下观众笑，佢又笑咗，完全系反转咗呢个“感动时刻”。

第三“史上最弱的怒骂”，当日泳装环节时，主持人要求谢嘉怡用一句说话闹主持之一陆浩明，广东话唔叻嘅佢，仲要闹人，佢即时讲咗句“你好丑样”，惹来全场大笑，大赞佢讲出真心话。事后谢嘉怡喺片中解释番佢系一个好平和嘅人，从来都唔闹人，仲从来都未试过用广东话去闹人，就系咁“第一次”就畀咗6号。网友睇完谢嘉怡真情剖白后，都被佢大方又坦诚性格吸引，大赞“好可爱，真性情美女”，“苏格兰口音好好听”、“看你笑场我也忍不住笑了”。