何雁诗郑俊弘完成隔离 自爆2个人去2个人返：好可惜

etin

歌手何雁诗（Stephanie）近月乐做跟得夫人，跟老公郑俊弘（Fred）去到美国登台兼度蜜月，简直甜蜜满泻！但欢乐嘅时光总系过得特别快，话咁快佢哋就已经返咗香港，日前更完成长达21日嘅“疫监”，搭正凌晨12点“放监”之时，Stephanie嘅父母同爱犬Huphup专程去到酒店门口接两公婆返屋企，妈妈仲负责揸机将呢个Warm爆画面记录低。

条片一开始就听到Stephanie呼唤“囡囡”个名，又激动得跳楼梯级迎接，而Huphup就一枝箭冲去“妈咪”嘅怀抱，仲要系咁揈尾相当开心！Stephanie即肉紧抱起Huphup狂锡，相当黐缠！之后又指示狗仔去搵Fred，点知Huphup兴奋过头，完美表演擦身而过，甚至差啲冲咗入隔离酒店，最后畀Stephanie捉住，“一家三口”终于可以团聚啦！

事后Stephanie接受访问，爆Huphup上车之后性情大变︰“佢真系好搞笑！见到我哋好High，激动完上车就唔理我！佢坐喺我妈咪度，用个Pat pat顶住我，叫极都唔望过嚟，应该系唔Happy我哋离开咗一段时间冇见佢，之前去旅行耐少少佢都会嬲！”讲到隔离期间嘅难忘事，佢笑话油咗幅呃到人嘅巨作，系佢锺意嘅城堡油画︰“睇落去好似好劲咁，其实系幅数字画，只系跟住啲数字去油，系几好嘅Burn time活动。”

打趣提到佢之前被好多朋友问会唔会2个人入去、3个人出返嚟？佢抵死笑话︰“一路都系讲2个人入去、1个人出返嚟，哈哈！但好可惜最后系2个人入去、2个人出返嚟。（谂住喺酒店入面互殴咩？）本来以为会，点知完全冇，有啲失望，哈哈！”认真爆笑！而“放监”后Stephanie话呢几日都系练波同搞Wedding嘅嘢︰“嚟紧有个Golf嘅活动，Wedding就整紧啲帖，仲有就系煮餐饭畀父母食，成2个月冇煮饭畀佢哋食。”呢个中菜宴，隔住个Mon斋睇相都已经流晒口水！