胡鸿钧熘冰懒系劲 何雁诗踢爆原来劲淆底！

etin

忙紧宣传新歌《今天不营业》嘅歌手胡鸿钧（Hubert），近年频频自我挑战作新尝试，好似曲风变咗，唔再独沽一味只唱情歌，啲歌加入Jazz嘅元素，又试吓喺MV度跳吓舞。近日佢就走咗去熘冰场熘冰，原来外表斯斯文文嘅佢都几有天分，着住对熘冰鞋，第一次踩冰，冇一仆一碌，又唔使扶住栏杆慢慢熘，一起步就似模似样，可以四平八稳咁一口气滑到半个场，今次终于知佢系咩料，原来唔系“流”，而系好“熘”！

连佢自己都沾沾自喜，将条成功挑战踩冰片放喺社交平台，讲畀大家知佢有几叻仔！佢留言：“我觉得第一次熘冰嚟讲，我冇仆住咁跣住去，已经好心满意足。”同老公郑俊弘度完蜜月嘅何雁诗踩场留言：“但继续表现处变不惊嘅状态，Feel到你心入面嗰种淆底。”被人睇穿嘅佢都好坦白回覆：“有时啲嘢，唔使讲到咁白。”一班粉丝就不停赞“第一次”好劲、好叻，一啲都唔失礼！

另外，Hubert首个个人卖票演唱会，将会于11月底在九展Star Hall举行2场骚，10月5日信用卡可优先订票。日前佢为个唱拍摄宣传海报，Hubert好兴奋咁话：“好多朋友、Fans 成日都催促我开演唱会，知道大家等咗好耐，一直畀心机去制作好多属于自己嘅音乐，同埋累积唔同嘅演出经验，今年系一个好时机，要多谢成就今次演唱会嘅各单位。”

今次演唱会嘅主题《The Day After》系由Hubert构思，佢话：“我同导演提出系自己10年来嘅一个里程碑，除咗回望以前曾经嘅历程，更加系对未来嘅一啲展望，自己近年都不停跳出舒适圈，去跟唔同嘅音乐人合作，尝试更多唔同嘅曲风，寻求音乐上嘅一啲突破，希望畀大家睇到不一样嘅胡鸿钧。”