黄嘉雯处女剧终于出场 袁伟豪原来系“军师”

etin

前港姐冠军黄嘉雯（Carmaney）圆梦成演员，日前大晒香肩出席处女剧《把关者们》嘅宣传活动，仲担任埋主持，令佢紧张又兴奋！讲到佢喺剧入面终于出场，Carmaney话每晚都有准时收睇，但始终系首次见到自己喺电视入面演戏，笑说个感觉好怪：“可能自己要求高，睇番硬系觉得可以再做好啲，首先有演技啦，再嚟就系心态！啱啱拍剧系好紧张，做海关拘捕人嘅时候，讲嗰啲字眼要啱，好惊错之下成个人都硬晒！希望之后可以放松啲，因为咁先入到戏。”又开心谓有好多朋友都有捧佢场，之后都有畀好多意见佢改进。

除咗朋友之外，Carmaney话拍嗰阵都有“军师”，呢个人就系剧中饰演佢上司嘅袁伟豪：“对佢有最多对手戏。（有冇压力？）初头有，但佢对我好好，教我好多嘢，例如点先唔会太死记硬背对白。”续自爆加戏“暗恋”对方：“本身我系好仰慕呢个呀头，我就加少少暗恋佢嘅元素，因为我太崇拜佢，觉得佢好正，不过拍完即刻抽离嘅，哈哈！”