张栢芝朝早7点贴地行街市 爆金句话…

etin

喺内地人气超劲嘅艺人张栢芝，身家上亿计，不过大家又唔知唔知，佢最锺意蒲嘅地方系咩呢？系咪中环嗰间潮店、抑或中环金钟名店？统统都错，其实佢系最爱行街市，仲要喺朝早7时，早到连啲街市档口未开晒门，够晒贴地问你服未？

日前栢芝就揸车到香港某室内街市展开血拼，戴住Cap帽兼素颜，边行边自拍嘅佢，冇话因为太早关系而有疲态，同平时一样咁靓女，佢话：“街市系冇人，系我最Enjoy，因为我觉得可以好Chill、好Relax咁睇每一样嘢，大家都会对你好好，因为成个街市只得你一个客人，哈哈。”

买餸煮饭畀仔仔食

第一站佢就去到相熟鱼档买鲜鱼，准备煲鱼粥畀细仔食，佢同鱼佬话要条新鲜又靓嘅鱼，但唔好咁贵兼要有鱼味，鱼佬提议买石斑，佢就讲笑话：“唔使（石）斑啦，（买）斑就阿妈破产。”又过隔篱档要买有啲肥嘅搅碎瘦猪肉嚟整意粉，仲买多旧用嚟煲汤嘅猪𦟌，本来佢仲想帮姪女买几只鸡，可惜未开档喎。

买完肉类，就去拣大仔最锺意食嘅通菜，佢话：“我大仔最锺意椒丝腐乳通菜，同我一样。”顺手要埋红萝卜、薯仔等等，佢又话：“开心过去名牌店Shopping，真系嘅，所以朝早嚟好好，啲哥哥姐姐会好专心帮我哋拣嘢，所以我觉得早睡早起精神好，身体健康。”再爆埋金句话：“同埋早上起身嘅人系有虫虫食。”相当搞笑！

最后一站就去冻肉公司买阿仔最锺意食嘅蟹粉丸，临走时被店铺阿姐要求合照，佢当然乐意啦，自己负责揸埋机自拍又点话？栢芝好人，唔知卖丸阿姐有冇收平啲呢？