落水湿身好嬲猪？周秀娜忟爆闹人：你点做嘢㗎？

etin

女神周秀娜（Chrissie）早前为MIRROR成员吕爵安（Edan）新歌《小谐星》担任MV女主角，当中仲要落水湿身演出，性感又唯美，原来呢一幕系突然安排，仲搞到女神嬲猪添？Chrissie喺社交网上载MV花絮片，当佢知道临时要落水时，托住头咁似乎有啲无奈，令工作人员话：“Chrissie嬲呀！”一面懵懂嘅佢慢几秒先话：“咩呀？我嬲？冇嬲呀！”而在旁嘅Edan就卖口乖大赞Chrissie好，一面得戚话落水都好靓嘅！而嗰晚其实仲挂紧1号风球，令Chrissie都忍唔住问Edan：“你做乜咁招风雨嘅？”

而成条片仲有另一焦点，就系导演要佢好忟憎咁讲电话，讲咩都得唔收音，Chrissie就深情演绎买唔到MIRROR演唱会嘅感受：“你点样做嘢㗎？你早啲Book呀嘛，你明知咁难Book，搞错呀！咁我依家点呀？”虽然唔知系认真定搞笑，但Edan就当场凼番Chrissie话留演唱会飞畀佢，不过女神就用哭腔话：“1张咋？1号风球！我落水！都系得1张？”令Edan大口气话：“10张！我话嘅！”点知隔篱嘅花姐闻言：“公司都系谂住畀4张你！”Edan就笑言：“系咩，我自己出钱买啦！”到拍摄时，虽然发生虾碌，Chrissie抛鞋时抛得太远，最后仲横风横雨，不过好彩都顺利完成，Chrissie就攰到擘大口瞓觉被任人鱼肉！