江嘉敏晒手臂5蚊银瘀痕：用晒成支去瘀膏

etin

无綫小花江嘉敏为圆梦做打女拍新剧，除咗要喺短时间“搣脂”10kg之外，仲要不停习武练跆拳道，见佢社交平台啲练习相全部都系笑哈哈，点知喺限时动态就见佢Post咗张“家暴”瘀伤相，足足有3大挞成个5蚊银大细嘅紫黑色瘀痕喺只手度，佢仲留言话︰“每个人都有属于佢自己嘅故事，我只手臂都唔例外。”真系隔住个Mon都Feel到痛！

嘉敏受访嗰阵自爆只手系因为练吊威吔所伤，连带盆骨同手臂都成“重灾区”，但佢大派定心丸指已经好番好多︰“有啲动作需要只手帮，我哋有戴晒啲护具嘅，依家一个星期练2、3日，每一次练习师傅都话我有进步，听到好开心！希望到时拍摄嘅时候啲动作可以做得再靓啲！”男友有冇帮手捽药酒？佢笑话已经搽咗成支去瘀膏，啱啱再买咗支新嘅，然后踢爆就连师傅都瘀晒，打趣问系咪佢砸瘀师傅？佢大笑否认︰“佢哋要做示范动作，测试吓条威吔安唔安全！”