吴若希惊变阿梅 蔡嘉欣似足纸扎公仔

etin

艺人吴若希（Jinny）与《姊妹淘》拍档蔡嘉欣早前“世纪破冰”，近日佢哋再次合作拍片互相为对方化妆，其中Jinny指蔡嘉欣貌似一代女神张敏，故特意为佢化上仿张敏妆容，而蔡嘉欣则指会为Jinny改行欧美路线。点知一开始就已经“出事”，蔡嘉欣为Jinny化眼妆时，竟然将眼影勾到出太阳穴，加上超长眼线，之后再化上超大阴影，令Jinny即忍唔住笑指似电影《功夫足球》中饰演“阿梅”嘅赵薇。不过蔡嘉欣就死撑呢个超霸气眼妆系别有用心：“你去到巴黎唔想畀人偷嘢嘅，呢个妆啱晒，对眼够晒恶！”Jinny就表示：“我知点解击退到人，因为啲人心谂‘呢个人系咪有病’。”



轮到Jinny帮蔡嘉欣化妆，本来都好正常，但到化唇妆时竟然化厚两倍，蔡嘉欣即指：“好似孖膶肠，原来吴若希嘅实力都不过如是。”之后Jinny索性改妆，用唇膏化上红色超大眼影，蔡嘉欣见到最后成果时，即笑到收唔到声，激动表示：“好样衰呀！多谢吴若希，我未见过咁样衰嘅自己，呢个肯定系纸扎公仔妆。”