拍完《大叔的爱》“有喜”！张纹嘉宣布孖男友同居

etin

前组合HotCha成员张纹嘉（Crystal）喺ViuTV新剧《大叔的爱》中，饰演Edan（男子组合MIRROR成员吕爵安）嘅大肚家姐“田一雄”，可以同两位男神朝夕相对齐拍剧，佢梗系开心呢，佢话“细佬”Edan优点多多：“其实我同Anson Lo（男子组合MIRROR成员卢瀚霆）对手戏多啲嘅，不过我就觉得Edan个人好乐观、成日都好开心，成个人好正面，同埋佢同Anson Lo两个都好勤力，好似有时拍剧有啲休息时间或者放假，佢哋就去拍广告，就算拍剧时有少少时间，佢哋就练舞，因为拍剧嗰阵，佢哋要准备开演唱会，不过佢哋咁忙都唔会有怨言。”

至于佢锺意Edan定Anson Lo多啲？她就哈哈笑，要视乎点边个出发点，如果话舞台上嘅表演者，佢一定拣Anson Lo，因为贪佢够型：“一跳舞就好正”，如果拣男朋友呢，佢会选贴地嘅Edan：“佢好有亲切感，所以好锺意睇佢做戏或综艺。”最后仲补话其实两个都锺意。

剧中佢扮大肚婆，而现实生活佢都有喜事，就系搬新屋同舞台剧演员男友林子杰展开同居生活，近期就为装修事而“癫咗”：“都搞咗成3个月都未得，可能疫情关系，订嗰啲柜喺外国送唔嚟香港，我哋又想自己搞清洁，希望7月中，我生日之前可以入到伙啦，不过我都唔惯，因为住惯市区，但依家系北区。”

佢又话系第一次正式扮大肚婆拍戏，唔知系咪剧组睇相，以为佢生得高大，所以帮佢安排咗一个过大Size嘅假肚畀佢，搞到佢腰酸骨痛：“因为个肚真系好大、好重。”