同马国明冇共识？汤洛雯：唔一定要结婚！

etin

“靓汤”汤洛雯在无綫古装剧《一笑渡凡间》饰演女捕快“苏柔”，角色比较男人婆，笑言与自己都有一半似，又自爆一埋位时即变得很man：“我有次镜头后坐到成个男人咁，连监制都忍唔住话我真系好麻甩。”她亦谓今次是打得最多的一套，坦言有受伤：“我拗过几次柴，但因为我系惯性拗柴，所以屈一屈就弹番起身，监制仲惊，佢好惊演员受伤，book咗替身，因为有啲动作，演员未必handle到，可能翻腾两周半落地，我真系做唔到。（有机会想试吓？）我唔得㗎啦，我出名论尽。”

讲到今次再与萧正楠合作，她表示与对方首次合作都是古装剧，今次再合作熟了很多，又难忘剧中二人轮流又孭又抱，笑言：“有场戏要孭住阿萧，佢仲话自己辛苦过我，但我系孭住一旧重过我嘅嘢，仲要面不改容，唔可以露出半点辛苦感觉，但见到我汗流浃背。”之后有幕她终于可以“报仇”：“佢有幕公主抱抱番我，我仲唔报仇呀？食咗几碗饭先拍呀，哈哈！我叫佢练定肌肉先，但佢第一吓抱都沉咗落去，我几惊，我已经有帮佢，只手捉紧佢条颈就可以卸啲力，但唔知点解佢咁弱啰！”

去年6月拍此剧时正值靓汤与马国明公开认爱，短短1年内，已多次传出婚讯，对此她无奈表示：“明白大家关心，但我哋想做对自然嘅情侣，多谢大家咁锺意，但有时都惊大家听到厌，因为同一样嘢传几次，都系答同一样嘢。”她坦言有与对方倾过结婚：“有普通情侣嘅共识，但冇exactly倾，因为真系未有咁嘅打算，想专注工作先，我嚟紧都有工作，所以8月结婚传闻系冇可能。”

讲到身边姊妹如朱千雪、岑杏贤、张嘉儿等都已结婚甚至生仔，但她就谓不会因此而心急：“每个人嘅路都唔同，最紧要适合、自己开心，觉得时间啱就做，我唔系嗰种plan定晒嘅人，觉得好大压力，我好随性。（会唔会突然闪婚？）可能㗎，但亦有可能唔结㗎，我唔系好传统嘅女仔，唔系一定要结婚，我细个都憧憬生小朋友，但依家觉得成日plan想做嘅嘢都唔会发生，所以顺其自然。”她亦坦言父母完全没有催婚：“佢哋唔传统，冇特别一定要做公公婆婆。（可能男友心急啲想结婚生仔？）冇喎，佢好chill㗎，比我更胜一筹，佢chill到连嘢都可以唔食，我chill就系食咩都得啫，但我要食嘢啰，哈哈。”