陈智燊“坐月”辛苦到喊

etin

前华姐冠军宋熙年（Sarah）同老公陈智燊（Jason）嘅网上影片频道一向受欢迎，最近佢哋出咗新片，讲到产后坐月嘅好处，而老公又可以做啲咩呢？今次佢哋就讲饮食、母乳同个人卫生！Jason话坐月期间，最支持老婆方法就系“佢食乜我食乜”，如果唔系佢望住你食就好辛苦，但到最后Jason都顶唔顺，怕食太多饭会肥！佢又好识讲嘢咁大赞老婆由第1胎到依家都咁Fit！

至于喂人奶，Jason就笑言从旁为老婆打气：“加油！加强！多啲奶！多啲奶！”Sarah就话千祈唔好咁做，会有无形压力，佢建议爸爸们唔使参与咁多，唔使问泵咗几奶、饮咗几多，如果想贴心啲就同老婆一齐凌晨起身喂奶，Jason就话有帮老婆洗泵，所以可以帮手洗嘢！佢又搞笑叫老婆赞佢，仲当场洒泪，Sarah笑问：“点解系你喊，唔系应该我喊咩？”网民都笑言Jason好似仲辛苦过老婆，搞到要喊嚟宣泄呀！

而个人卫生，Sarah话两次坐月，Jason都帮佢洗头，因为怕佢整亲腰、冻亲、洗得唔乾净：“因为唔可以淋水洗，要煲完药水冲个头！咁都几贴心嘅！”仲可以促进夫妻关系添！最后佢就讲到凼老婆绝招，就系按脚，Sarah一面Enjoy话：“系喇，按吓脚按吓肩，‘Happy Wife Happy Life’真系非常之有学问！”​