拍拖后冇锡戏！汤洛雯激咀谭俊彦 爆马国明9秒9睇咗

etin

艺人马德钟、汤洛雯（靓汤）、陈炜、何广沛、郭柏妍等，昨日为无綫新剧《双生陌生人》进行拜神仪式。事后马德钟孖靓汤受访，女方指剧中跟一人分饰两角的马德钟有超多对手戏：“佢系并列男一，我同佢其中一个角色系初恋旧情人，但佢不辞而别，之后佢嚟农庄搵我想翻挞。”男方即笑住澄清：“剧中同时我有老婆陈炜，我只系想补偿佢（靓汤）啫。”

靓汤主动提到2人于剧中暂未有亲热戏，笑问是否男友马国明唔畀拍？她笑住否认：“如果剧情需要都会拍， 佢一定唔会唔畀，公司啲尺度唔会大得去边，我亦冇要求佢唔好拍，但自从我拍拖之后都真系冇拍过锡戏，如果拍嘅话之前会讲声。（同谭俊彦上次咁激情未拍拖？）未，嗰个对我嚟讲系有啲激， 佢（马国明）9秒9睇咗。”马德钟闻言搞笑话：“马国明唔系唔畀你拍，只系唔畀你同我拍咋？哈哈！（你有冇压力，人哋有男友？）冇谂呢样嘢，我哋系专业嘅演员，只系投入角色。”

然后，靓汤指因最近密密去农庄拍外影，双手兼双脚惨遭蚊虫狂咬，大骚红色一点点惨况，并大赞马德钟醒目自备防晒及蚊怕水：“我同佢肤色一黑一白，戥打灯啲工作人员辛苦。”马德钟自爆搽50度防晒，本身肤色黝黑的他自嘲：“再黑啲就睇我唔到！但拍咗几日都有晒黑咗。”

另外，讲到靓汤于本周四（6日）34岁生日，男友马国明又刚刚好拍毕《白色强人II》回港，问到如何庆祝？她透露会香港一日游：“嗰日暂时可以放假，想去行吓山、去主题乐园、Staycation咁。（男友返港陪你更开心？）佢去内地拍剧嗰阵我哋有视像，唔似以前爸爸嗰个年代净系可以打长途电话。（依家摸到真人喎！）我哋呢啲系灵魂交流。（神交咁呀？）系呀，哈哈！”​