麦秋成谂定生多个！汤怡有信心怀孕9个月照接Job

etin

准靓妈汤怡昨日挺住7个月肚，现身位于元朗形点的英皇珠宝新分店担任“明星店长”，同时又预先为自己挑选首份母亲节礼物。见穿波鞋到场的她步履轻盈，四肢仍然相当纤幼，趁活动开始前夕，才乖乖坐低换上约3吋的高踭鞋，继而当活动结束后，她再次换回波鞋做访问，全程安全至上！

她透露预产期是7月，目前正进入佗B倒数阶段，加上早前好奇心发作，上网搵生B片睇，搞到心情有少少紧张：“睇咗一段就已经忍唔住喊，因为我系选择顺产，都会谂唔知到自己生嗰阵会点呢！情绪起伏好大，所以唔够胆再睇。”又说情绪大到早排冇见老公麦秋成足一个星期，个心情都差少少：“佢好忙，同时要排4只舞，每日都系早出晚归，只系有时半夜扎醒先见到老公一眼。”并趁机“大呻”老公忘记自己预产期：“佢一定要陪我入产房，我有威胁佢，如果佢唔入就后果自负！”

问到今次活动是否产前最后一击？她笑住否认，更大笑话有信心佗到9个月都继续接Job：“之后都有商业活动，觉得自己都应付到。”身体还有任何不适？她表示初期怀孕时就坐骨神经痛，直到最近因肚皮开始大，腰部随之而增加负荷，连带有顶胃感觉：“行动都系轻松，头3个月试过反胃，目前就以少食多餐为主。”

至于追问到BB性别，汤怡继续大卖关子，希望留到Baby Shower才揭晓：“暂时大家估得好平均，而我本身已经知，仔女都冇所谓，老公之前话锺意仔，但当养咗只狗女就觉得女都唔错，因为会嗲啲。”续大爆老公不停再催生：“呢胎未生，佢已经谂定生多个，但我想抖2年先。”

讲到早前她于社交网站晒大肚玩瑜伽倒立相后引起网民争议，有的担心她会发生意外，有的却认为她为“呃Like”才Post，汤怡说：“多谢大家关心，呢个动作我喺佗B前有学过，初头个肚唔系好大，知道自己应付得嚟，但为免长辈担心，最近都冇再做呢啲动作。”另外，谈及终可名正言顺以准妈妈身份度过首个母亲节，她说：“个感觉好神奇，佗B之后终于感受到做妈妈嘅伟大，以后要锡妈咪多啲，冇经历过都真系唔知咁辛苦。（老公会喺母亲节有咩表示？）又唔需要佢有咩表示嘅，佢平时都会帮我按摩只脚，仲试过按到瞓着咗，呢啲细节位都令我好感动。”​