当众批评身形唔掂 庄思敏做主持辣㷫女星

etin

提起艺人庄思敏（Jacquelin）就会想起潮流节目《姊妹淘》，由首集至今，她做足9年。她笑言现时节目愈来愈多主持，而且个个都非常纤瘦，令她甚有压力：“因为我比较高大，感觉好大只，经常畀人话我个头太大，我一肥就肥喺块面，但减肥最后先瘦面。”

回顾过去，Jacquelin称最初曾试过因说话太直而得罪嘉宾：“我同雨侨最初个作风都比较大胆，因为我哋唔系主持人出身，所以乜都问乜都讲，而令到嘉宾唔开心。有次我哋研究Leggings呢个话题，我哋讲到有咩人系唔适合着，跟住就话个嘉宾咁嘅身形就唔啱着喇！当刻已经感觉到对方有啲黑面，而事后佢都有反映，话我哋咁讲嘢会令到佢唔舒服。我哋同呢个女艺人唔熟，加上当时大家讲得太兴奋，所以冇为意。”她表示后来主力介绍化妆扮靓，少讨论个人打扮风格，以避免踩地雷，她笑说：“经过9年嘅训练，至少识得睇人眉头眼额，知道人哋咩样系代表唔锺意。”

直播带货吸金

除了主持技巧进步不少，她亦开心能透过节目认识到不少人：“包括玄学家、设计师、化妆师等等，有啲人平时唔熟，都因为节目而熟咗，我又可以免费问玄学家风水问题。（有冇贴中你会闪婚？）都有，好多都话我系会闪婚嘅类型。”又指因节目带挈令其扮靓达人的形象深入民心，所以有不少美容护肤产品找她直播带货。

​