初恋伤得深 陈滢再拣男友要呢方面技术好

etin

艺人陈滢昨日出席剧集《伙记办大事》宣传活动，提到在剧中有学生妹造型，她称可一不可再：“演年纪大过自己系容易过演年纪比自己细，因为已经有好多经历，好难演番初心同单纯嘅感觉。我有两剧同时播，赖慰玲同蔡思贝话同一晚睇到两个唔同陈滢，但系学生妹就有啲卡住，可能下次要搵另一个人扮我学生版。”

而在剧中她有场戏对住前度爆喊，她坦言拍摄时想起初恋男友：“佢系伤得我好深。（点样伤你？）有背叛同有啲推撞，但我好锺意佢。（经历好惨？）好多关系都会有争拗，只可以话佢唔系好嘅初恋。”她指人生中拍过4次拖，自言第5个未出现：“我要开工冇时间去识人，朋友戥我心急，我有日同朋友食饭，有4个人都话要介绍男仔畀我识，但我好怕呢啲，觉得尴尬。”

另外，她透露原本为剧集而考电单车牌，但最终失败：“考到强制试，我上电单车唔够3秒就跌咗落嚟，所以拍呢套剧好安全，全程有替身。（会唔会再考？）唔会，一把年纪，唔想自己生命有危险。拣男友都唔可以揸电单车，因为危险，但要识揸车，同技术要好。”​