罗子溢小男人争认低威 李彩华大女人全权话事

etin

艺人罗子溢与李彩华（Rain）在新剧饰演一对，不过私底下爱情观却是两个世界。子溢重视另一半的感受，甘愿做“小男人”，反观离婚的Rain则是“大女人”，明言在事业与爱情之间，必定选择前者！

子溢与杨茜尧由拍拖至结婚，外界都认定这段关系“女尊男卑”，但EQ高的他未有动气：“观感嘅嘢需要时间改变，与其唔开心，我会选择做好自己事业先，咁近年我有进步喎，如果一直停滞不前就话失落啫！”当大家都以为他被老婆的“强势”慑服，他即解画：“依家仲系清朝民初咩？好多女性身兼两职。我唔系怕老婆，亦唔系怕佢嘅性格，而系惊佢唔开心，惊佢冇人陪会闷。总之平日唔影响正常生活嘅嘢，我尽量Say Yes，家和一定万事兴。”

开火拖长“战线”

他又自爆初相恋已是“有异性冇人性”﹕“我都想大男人㗎，但好自然就会‘让’对方，所以冇乜约过朋友出嚟倾心事。喺女生角度嚟睇，梗系好事啦！”原来他与老婆有“不成文规定”：“每次有冲突，我都会首先‘释出善意’，缓和气氛凼番佢。其实喺太太身上，我先真正学识两性相处之道，好似我好性急，嘈交一定要即刻解决，系佢教晓我要先冷静，有时愈急解决就愈大镬，将件事摆番1、2日再处理，效果反而更理想。”

在单亲家庭长大的子溢如今成为“宠女狂”，他直言：“以前父母每次嘈交，我同家姐都匿入房，虽然唔系亲眼见到，但听到都知咩事啦！依家我同太太、外母等都尽量唔喺囡囡面前表现负面情绪，唔想佢拥有同我相同嘅童年。”

子溢锡晒老婆做“肌佬”

子溢出名是“爱妻号”，对老婆千依百顺。婚后为了上车筑爱巢，他不时排队争入市，2017年收到指令后，就独自到人山人海的销售处等候买楼，免得太太操劳。原来他保持健硕身形亦是为了满足老婆，全因茜尧说过爱他够大只，所以他不敢清减太多，只望为另一半添安全感。

Rain闪婚闪离，但直言未有后悔，认为婚姻失败源于双方的文化及价值观差异，最大问题是聚少离多：“大家见面时间真系唔多，沟通唔可以净系靠电话。如果单靠短讯往来，对方可以谂到好多嘢嚟覆你，唔系直接嘅反应。”而她对于日后感情生活虽有憧憬，但明言不想再婚，又自认大女人：“如果事业同爱情唔可以并存的话，我一定拣事业，可以经济独立，锺意买乜都自己决定，唔需要征求对方意见。”

嫌追求者难“达标”

她形容30岁是人生分水岭：“好似所有嘢突然唔同晒，以前拍拖畀人Lead住，试过因为着短裤白Tee出街畀男友闹，当时好委屈咁喊咗出嚟。之后拍拖反而系我主导一切，上段婚姻佢唔畀我拍亲热戏，但其他嘅嘢系我话事。”Rain坦言刻下有追求者，但爱情观已不再初心，面对两性关系存在心理战：“有啲啱倾嘅朋友，大家都知发生紧咩事，不过佢又唔系成日搵住我喎，锺意一个人点会咁？一定有古怪啦！呢啲呃唔到我。有日同子溢、艾威食饭讲开呢个话题，佢哋都同意对方一定有好多个‘可能’。”

如果觅得另一半，她希望尽情享受恋爱的浪漫感觉：“可能早出道，以前拍拖一啲都唔浪漫，因为最浪漫嘅都喺演戏时发生咗，我识嘅‘桥’仲劲过佢哋（追求者），所以畀唔到惊喜我，暂时未有人满足到我嘅要求！”

Rain女王下令点“阿四”

见惯风浪的Rain多年来拼搏名利双收，形成硬朗性格，故每次拍拖都女王上身，要求另一半“听命令”！除了行街购物要男伴做“阿四”外，又指定节日要收花，增加仪式感。吸金力强劲的她不要求另一半交“家用”，实行自己赚钱自己使，坚持财政独立，所以不时被拍得现身名店扫货，亦入货买砖头，名下物业多不胜数！