无綫小花邝洁楹(Judy)与刘颖镟(Tiffany)这对“长短脚”闺蜜,除了身形对比大之外,连家庭背景都各走极端。前者含住金锁匙出世,是家住几千呎独立屋的“富家女”,反而“悭家女”Tiffany离乡别井来港赚钱养父母,花一分一毫都要谂过度过。因背景不同,两人择偶条件有明显差异,Judy不问男友搵几多,而Tiffany则认为另一半一定要有赚钱能力,目标明确!
千金小姐Judy虽然细细粒,但胜在样子甜美,深受异性欢迎,最近与同样出身富裕家庭、经营餐厅酒吧的Ricky打得火热,并火速展开半同居生活,可谓门当户对。她不讳言的确唔使养家,但强调父母白手兴家,令她明白赚钱要靠努力,同时亦影响其择偶要求:“我需要同我目标一致嘅男仔,将来谂法一样,否则好难行,依家拍拖系长线为主,锡我都系次要,有冇钱睇大家点睇,我都冇问男友搵几多钱,大家都经济独立,可以支持到自己生活。其实当初识男友时,佢都只系着T-shirt,好难知佢系有钱,当然后来了解过系好男仔,所以先发展到依家咁。”
几时先嫁? 每当提起男友,Judy总是一副冧样,自言是浪漫型,平日会花心思送惊喜,她说:“我整过爆炸卡畀以前嘅男友,佢一打开会爆晒入面我哋嘅合照,每幅相都有写字,整咗4、5个钟,我唔介意做多啲呢啲嘢,好锺意睇到人哋开心个样,好满足,当然我都锺意收惊喜。(收求婚戒指?)哈哈!我冇计划几岁做咩,女仔系有啲怕丑。”
拒玩“姊弟恋” 讲到惊喜,Judy分享一位追求者送给她的表白礼物:“20岁嗰年,个男仔整咗月历畀我,入面写低我哋第一次讲电话、食饭之类,不过我哋最后咩都冇发生,虽然所有条件都适合,但重点系佢细过我半年,知佢有啲嬲,嗰时识咗3个月,仲写埋如果当日我接受咗,就会系认识100日。”
港姐出身、同样称得上索女的Tiffany,家境一般又要养家,故追求现实的她未有如Judy般,陶醉拍拖和浪漫谈情,所以曾被前度投诉冇情趣。她称入行前有个美国初恋男友,之后亦曾与“大鼻港男”胡㻗传绯闻。由于恋爱经验不多,她曾向心仪对象写情书,之后还要上网学折心心,做法非常Old School,难怪她扁晒嘴指当年男方收到情信后反应平淡!她笑说:“其实我都唔太浪漫,好简单,都系锺意接收多啲!细个情人节整朱古力都系整晒畀成班同学,好大爱㗎!”
唔拣大只仔 谈到拣男友准则,现实的Tiffany坦言家庭背景非首要,反而会睇对方有没有能力搵钱,她说:“我系欣赏好有斗心同付出嘅人,搵钱畀家用好重要,同埋锺意孝顺屋企人嘅男仔,我唔想靠对方,妈咪教要靠自己。(咁男仔外形呢?)我本身都好高,希望对方高少少或者同我一样高,要有少少肌肉,未至于健身咁大只,揽住佢会唔舒服,可以有肚腩仔,唔可以畀自己放肆咁多,一齐做运动Keep Fit。”
​倾完择偶条件,当然要学吓制作Sweet Sweet蛋糕冧男生,边整边谈男仔经。追求浪漫的Judy愿花几粒钟为男友做手作送惊喜,相反Tiffany喜欢平淡爱情,连折心形情信也是急急上网学,创意欠奉!
|