无綫节目《#后生仔倾吓偈》专出有潜质新血,当中两位“后生女”于鼠年名利双收,首先陈欣茵空降综艺节目《学是学非》担任“是非精”引起关注,其后游嘉欣接力凭剧集《香港爱情故事》成功弹出。2人喺节目训练下变得牙尖嘴利,就等佢哋教你拜年时点样得体回应“热心”亲戚嘘寒问暖,包你笑住过肥年! 恋爱题:拍拖未呀?介绍男仔畀你识! 游嘉欣:等啲表姐拍拖先啦,我慢慢都唔迟。 陈欣茵:我等咗呢个机会好耐㗎啦! 生育题:几时生小朋友呀? 游嘉欣:我仲后生,等我啲阿哥家姐生咗先啦! 陈欣茵:我随时ready啦!不过依家陪屋企人先,之后加多个小朋友就Perfect! 事业题:搵到工未呀?人工有冇3、4万一个月? 游嘉欣:吓!3万蚊咁少,我唔只赚3万㗎喎! 陈欣茵:3万收入就未有啦,不过被动收入就已经有! 两位后生女去年逆境求存、成功上位,牛年誓要将旺气延续,游嘉欣透露今年主力拍剧,并坦言暂不打算搣甩“屋邨妹”称号:“年年都要努力赚钱,但暂时唔会想摆脱公屋,住咗咁多年都有感情,加上配套设施实在太好,宁愿装修整靓间屋。”陈欣茵则继续向主持方向进发:“上次《学是学非》我净系参与最后几集,学习同体验嘅都比较少,期待新一季快啲拍,由上年尾等到依家啦!” 2人唔只发展方向、性格截然不同,就连拍拖经验都完全相反。从未拍过拖嘅游嘉欣直言希望感情尽快有着落,令旁边桃花运劲旺嘅陈欣茵听到后,即化身恋爱专家教路佢要降低择偶条件,同埋唔好成日宅喺屋企做“宅女”。​
|