邱晴被问价几十万陪出埠 高度戒心唔敢去饭局

etin

落选港姐邱晴于2017年签约无綫做“亲生女”，3年过后，现转签1年1骚，疫情期间完全冇工开，笑说：“真系好耐冇收入，好彩之前中咗奖，嚟紧接咗另一个电视台嘅综艺节目，依家保持神秘感。”决定外闯的她被问到是否很积极的人，她说：“唔系，反而性格比较优柔寡断，啲人成日话我好蠢，叫我注意啲，就系因为啲人成日咁讲，所以我就样样都好小心，呢个又要提防，嗰个又要小心，搞到自己好唔开放。（因为小心而错失机会？）都系，好多人会邀请食饭，识多啲人可能令到你有更多演出机会，但我就系惊，唔敢去。”

事事惊青　错失机会

问有否被问价、或去过“女星饭局”？她说：“好好彩冇去过嗰啲饭局，喺社交网就收过几次问价，有人出几十万叫陪佢去边个国家，劲恐怖！（你点样处理？）我就传畀啲朋友睇，我冇覆佢，唔会当真，我亦唔敢，宁愿靠自己行，慢慢发展。”又表示最近请风水师傅指点迷津，师傅指她不懂珍惜，认为她应该有更好发展：“师傅话只系交际应酬又唔系做啲咩，你咩都推，人哋唔搵你就搵其他人，机会就系咁流失。可能我谂得太复杂、太保护自己，做呢行始终都要圆滑啲、open啲，我都要学识social。”

21岁的邱晴希望25岁前闯一番成就：“我有个朋友话25岁之后就老，叫我到时就唔好浪费时间，做啲实际啲嘅嘢，依家趁后生仲可以任性、玩吓。（如果转行想做咩？）想开画室，教小朋友画画。”​