红星争住客串《爱回家》 边个破收视纪录咁威水？

etin

艺人陆浩明喺社交网疑似自爆客串《爱．回家之开心速递》，其实剧集不时都会搵嚟演员客串，仲要粒粒都系红星添！好似喺剧中嘅香港岛大学，饭堂大芬姐经常以“岛大冯盈盈”自居，唔少观众都好期待“真．冯盈盈”出场！喺第937集大家终于等到，盈盈饰演大芬姐姪女，入岛大为姑姐报仇！冯盈盈分别以4眼Look及浴袍上阵，造型鬼咁清纯，真系冧晕一班网民呀！

歌手古巨基相隔21年再出演无綫剧，虽然只系客串，但都有唔少对白，饰演外卖仔嘅佢出场时间足足有33秒，佢拎住两大袋早餐送去熊家，咁啱撞正熊家喺度练武，基仔就话自己都对武术好有兴趣，对一个外卖仔嚟讲都算好多嘢讲喇！虽然佢隔咗咁耐再拍剧，但演技冇生疏，唔只演出令观众惊喜，原来拍摄当日，一班演员事前唔知基仔会出现，所以佢哋都好喜出望外！

有“收视福将”之称嘅欧阳震华（Bobby）客串剧集将收视推上高峰，录得32.3点，认真巴闭！Bobby喺剧中与一直视佢为偶像嘅群姐（许思敏饰）有大量对手戏，大玩三世情缘，仲向《色，戒》“致敬”，画面够晒香艳！虽然已经分上、下两集播放，但好多观众都话唔够喉啰！

至于最近期要数到最星级嘅客串，一定系非苗侨伟同米雪莫属喇！两人扮演接龙集团剪彩嘉宾，即系做番自己！虽然冇台词但亮相时间都有2分钟，苗侨伟就笑言未拍过《爱回家》点红，又话Bobby拍完之后好多观众好锺意，仲破晒记录，要叨光咁话！​