结婚生仔紧要过攞影后！余香凝有“艳遇”吓到走

etin

现年27岁的余香凝（Jennifer）不时表明恨结婚生仔，从小到大都渴望组织家庭：“唔想因为我做呢行而耽误咗呢件事，甚至觉得我嘅人生家庭比做嘢更紧要，有啲朋友会觉得我做呢行如果咁快结婚会好嘥，但咩叫嘥？如果我为咗攞影后而努力到40岁，但万一攞唔到呢？到时身体冇咁好，生BB就难啲，呢个先系肯定嘅事实，我想Keep住人生同事业一齐行。”问到可会为家庭放弃事业？她说： “咁又唔会放弃，有工作梗系会做，但如果结婚生仔后真系会冇嘢做嘅话，咁我都甘愿，我唔觉得系牺牲，反而叫我冲多10年事业先结婚，咁我就觉得系牺牲。”

问到现时找到另一半未？单身的她笑说：“冇呀！呢排更难识人，但我信缘分。（暂时有冇人追？）真系冇！由细到大啲人以为我多人追，但真系冇乜人追，我一Sense到，我就会惊。”她又自爆去年庆祝陈诗欣生日有“艳遇”，但惊到走不切：“食饭隔篱枱有几个男仔行过嚟问我哋攞电话，我哋就话唔系几好，佢哋话请食甜品，我哋话唔使啦有蛋糕，我哋好惊，影完相之后我话不如返屋企先切蛋糕，最后我哋连蛋糕都唔记得攞就走咗，我哋都唔知点解咁惊，我接受唔到有啲三唔识七走过嚟嘅人。”

2018年与陈家乐分手的Jennifer，被问到可会再与圈中人拍拖？她坦言不想再与幕前人拍拖：“因为成件事会变得好复杂，唔系两个人嘅事，变咗商业考虑，我只系想简单喺埋一齐。（因为之前系类似咁嘅经历？）系啰！”她不想玩玩下，要很夹才会拍拖，故要细心挑选，问到可是想30岁前结婚生仔？她笑说：“想啫！但依家讲得多都惊冇，20岁想25岁，25岁就想30岁，希望唔好继续迟落去啦！”​