迎佳节整灯笼 卫诗雅立体版风筝重拾童年梦

etin

中秋将至，有报道指今年灯笼销情惨淡，不少艺人儿时都喜欢玩灯笼，佢哋有啲仲亲手造过添，玩得相当开心！

卫诗雅：“我记得小学时学过整灯笼，当时系视为风筝进化版，立体版风筝，不过我系未成功过，希望将来可以有机会畀我试吓整兔仔灯笼，仲要有碌嘅，同埋我觉得如果学识嘅话，第二日可以教晓下一代，传统嘅灯笼唔系依家嘅新式灯笼可以取代嘅，系一门艺术。”

周志康：“细个试过将食完嘅碌柚皮制作成灯笼，虽然整到岩岩巉巉，但系好原始嘅感觉依家搵唔到。大女今年五岁，可以接触火，玩吓蜡烛，今年都可以整个碌柚灯笼畀小朋友玩。”

陈健安：“整灯笼要讲番喺小学上美术堂时，依稀记得系整过一次，都系用一条条嘅竹，再用唔同颜色嘅玻璃纸，跟住用白胶桨慢慢黐上去，记得当时系整咗一个篮状嘅嘢，应该系兔仔个身嚟，但我唔系好记得，哈哈！大个咗之后就冇再整灯笼，依家屋企多咗好多细路，哥哥、家姐啲小朋友，佢哋都好少亲手整，会买啲入面有音乐嘅电灯笼，我哋每年中秋节都会全家人拎住灯笼出去赏月，之后就返去食月饼，好开心！”

顾定轩：“我细个冇试过自制灯笼，我一接触就已经系玩塑胶灯笼，中秋当日食完饭就会落公园玩，间中会见到啲人玩纸灯笼会觉得好羡慕，因为好少地方有得卖，唔知去边度买，当时又冇得上网学去自制。”​