个个都系女神！盘点娱圈新一代绝世好女友

etin

成日话选美系进入豪门嘅第一步，目的都系钓金龟做少奶奶，下半世唔使忧，不过呢啲已经系上一代嘅写照，依家港姐华姐出身嘅花旦，唔单止系无綫独当一面，有自己事业、靓女又挨得之馀，仲出钱帮埋男友上车、一齐供楼，更爱屋及乌，连男友喜欢嘅卡通人物，都将佢着上身，目的为博男友一笑，呢啲咪最佳女友啰，男人真系要好好珍惜佢哋喇！

汤洛雯爱屋及乌

汤洛雯（靓汤）同马国明“明汤恋”获全城祝福，粉丝都知马国明最爱就系唐老鸭，靓汤就专登买咗唐老鸭Tee，去到海边影咗辑相送畀男友，而且仲要系四连发，每个Pose都唔一样，靓汤呢份礼物认真有心思。

冯盈盈出首期唔落名

冯盈盈同旧爱医生男友Martin拍拖四年，买入何文田豪宅同居试婚，可惜“相见好同住难”，最后分手收场。虽然情已逝，但冯盈盈系过程中绝对系最抵得谂女友，佢有份畀首期助前男友置业，但业主名一栏就冇名，仲倾好男友负责供楼，自己则负责水电煤及日常生活开支，出钱出力同男友挨，呢啲女友去边度搵呢？

张曦雯照顾被隔离男友

华姐冠军出身嘅张曦雯同外籍靓仔男友恋情自公开以嚟爱得甜蜜，早前因为外籍男友健身的地方有确诊人士，为安全起见自我隔离14天，期间张曦雯就负责起男友一日三餐等要求，为免与男友冇得见，张曦雯就用Facetime同男友沟通，真系体贴又善解人意。

张宝儿出钱助男友上车成功

富家女张宝儿同男友袁伟豪早前豪掷7,000万买入豪华爱巢，助男友上车成功，唔单止咁，今年袁伟豪生日，宝儿为佢安排一个惊喜生日P，仲特别订制1:1嘅结他蛋糕，系仿照袁伟豪最爱嘅结他嚟整，宝儿仲喺社交网发表爱的宣言祝贺男友39岁生日，难怪被网民封为绝世好女友！