黎耀祥陈豪唐僧上身绝招赶邪花

etin

两位视帝黎耀祥与陈豪多年来都是绯闻绝缘体，陈豪指“洁身自爱”背后，要时刻有警惕的心，发觉唔对路即避之则吉，绝不容许“邪花”埋身！至于祥仔笑言自己从没女人敢埋身，故对“女星送上门”之事闻所未闻！

圈中出名好好先生的黎耀祥与陈豪（Mo），入行以来均零绯闻，就如“TVB唐僧”一样，身边没有“蜘蛛精”埋到身，祥仔笑称：“天生冇条件嘛！我成日都唔想做唐僧。（成日都想曳曳？）你睇吓我老婆几放心。”Mo则表示与祥仔均属正直之人，稍觉女星有“动静”，会极速闪人：“我觉得我同祥仔都系属于正直嗰啲，有啲乜嘢古灵精怪唔会黐埋去，见到唔对路就走，起码唔会去到嗰一步。你会Feel到有啲唔对路，佢试咗你几嘢冇反应就唔会搞。”

唔觉娱乐圈复杂

祥仔即笑言：“我连呢啲都冇添呀！我都唔明，乜嘢唔对路呀？冇呢啲喎！佢都话望到啲，我直头望唔到。（吴启华话内地有啲女星畀房号佢。）我哋真系冇，真系唔知。我成日觉得呢啲系咪剧情嚟㗎？拍戏先有，几十年都未见过，啲人又话呢个圈好复杂，有几复杂吖？饭都食唔到一餐，收工咪返屋企，直头好似以前返学咁，争在未着校服。”

Mo自言表面洋化，但其实内心非常传统：“我系抱住嗰种男女授受不亲嘅心态，虽然当我演花花公子时会开心，但呢啲系乐而不淫，演戏同生活系两样嘢，现实生活我好怕丑，但当我去到做戏，攞正牌做坏蛋就唔同。”

二人均于无綫热播剧集《杀手》演杀手，有多位女角围绕身边，艳福不浅，但性格和遭遇大不相同。祥仔一开始是顶级杀手，于首集更有与台妹揽锡，但之后变成潦倒的低价杀手，最终重新振作再出发。他透露此剧拍足半年，瘦了15磅以上。谈到演绎与外形都要多变，他说：“好好彩，好少剧可以完整有晒前后期、有跌宕，早期系No.1杀手，年少气盛同少年得志，卒之搞到潦倒中年。（你又要肥又要瘦身，好辛苦？）个肚系假嘅，但前期唔会好瘦，之后先Fit，好多阶段。（拍拍吓要操番Fit？）其实对我嚟讲还可以，因为开工会食少啲嘢。我系一个好锺意食嘢嘅人，平时唔使开工喺屋企又或者同朋友出去食饭，要我唔食嘢几咁辛苦，反正我返公司开厂都系带壶菜。”

​计算黄金比例

至于Mo饰演有型、收费昂贵的杀手，闲时于自己的咖啡店冲咖啡、沟女，非常写意。谈到拍摄过程相对祥仔较舒服，不用拳拳到肉、周围跑，Mo说：“我嘅难度唔一样，要透过件衫将啲肌肉爆出嚟，要增磅，祥仔系要减磅。之前我有同佢分享计卡路里，我不断做Gym，食嗰方面要配合，食鸡蛋、鸡胸同蛋白粉，要食4成碳水化合物、4成蛋白质同两成嘅脂肪，呢个先系黄金比例。”