富二代冇得加分！何依婷：追我唔使对我太好

etin

艺人何依婷（Regina）2017年参选港姐赢得亚军后入行，去年加入无綫人气节目《学是学非》成为是非精一员，仲愈做愈好，颜值高、玩得够放，主持功力绝不比师姐冯盈盈失礼，更有机会做大骚司仪，早前于无綫剧《机场特警》内饰演野蛮女友一角，亦获得不少赞赏！

欣赏麦明诗冯盈盈够勇敢

事业发展顺畅，Regina当然开心，不过她亦曾遇过低谷期，一度在家爆喊过日子，Regina表示：“选港姐期间，由普通女仔，变成一个要接受咁多舆论压力嘅人，太多闲言闲语，但当时我真系唔知可以点做，完全冇经验，所以睇到啲恶意攻击，只识得匿埋屋企喊，所以我好欣赏师姐麦明诗、冯盈盈，遇到啲乜嘢冤屈嘅事，都会喺社交网反驳，好勇敢，讲番事实出嚟，其实我当初都可以勇敢啲，被屈当然要澄清，唔应该只系匿埋喊，太冤枉。”

旅行都系穷游

Regina直言当年觉得最冤枉是被指“炫富”：“当时话我成日去旅行，咁我攞到奖学金去咗英国读书，只系周末搭火车去附近城市行吓，圣诞节由英国去法国，都系穷游，跟同学每人夹百几蚊租酒店瞓碌架床，话我炫富真系好委屈！仲有啲更离谱嘅，话我一个人去咁多地方喺被人包（养），我同成班同学一齐去㗎，点解会传到咁？当时我仲觉得好对唔住父母，佢哋咁辛苦养个女，点知畀人咁写法，就连我九十岁嘅爷爷都好唔开心，仲叫我唔好选，话养得起我，唔想我受咁多委屈。”

名车自己买

Regina未入行前于知名公司内担任金融服务顾问，收入丰厚，之后加入娱圈，早前亦因驾名车，再度被指炫富，她直言：“我入咗行二年几，都好好彩有几个节目喺手，同埋经理人好叻，帮我接到好多出面嘅工作同有广告拍，所以我嘅收入唔会比我以前嘅差，架车系我送畀自己25岁嘅生日礼物，我嘅工作全部讲得出嚟，有得计嘅。”

追求者唔好送花

现正单身的Regina，当然有不少裙下之臣，问有无一些施展疯狂的攻势，天天送花：“我唔喜欢收花，会谢㗎嘛，好浪费，反而识音乐会加分，同埋我好怕人哋对我太好，因为最后做唔成情侣，我会觉得负咗对方，所以追我真系唔需要对我特别好，简单交往做朋友先。（咁啲喜欢送礼嘅富二代咪无优势？）sorry，真系冇得加分，哈哈！”