冧到爆！汤洛雯想同马国明一生一世

etin

“明汤恋”爆出后轰动整个娱乐圈，继马国明昨日甜丝丝受访后，女方汤洛雯（靓汤）今早约于11时10分揸车离开红磡寓所，回电视城准备为的主演新剧《一笑渡凡间》的外景。

全黑打扮的靓汤甫现身化妆间，即被记者连番恭喜“破Dry”，她一脸冧爆讲多谢，全程甜笑受访，并透露刚开始跟马国明蜜运：“确实日期唔讲啦，留番畀我哋自己私人啦！（点开始？）都系倾偈啰，但当然系确定大家都系适合嘅对象，先会带返屋企见父母。”讲到她的父母均非常满意“未来女婿”，畀足一百分之馀，更指马国明有望超越满分，靓汤哈哈大笑说：“我有睇到呀！好夸张呀！咁佢对我嘅屋企人系好好，所以都值一百分，但夹硬话要减少少嘅话，就98分啦！畀两分佢做得好少少！（父母都话放心交个女畀男友？）妈咪有啰，都估唔到佢会咁讲，因为佢平时都话‘我个女系宝嚟㗎！’”

问到双方都是以结婚做前提拍拖？靓汤指每次拍拖都是以结婚做前提：“之前啲感情就Timing唔啱，所以都单身咗两年，当然喺呢段时间都有了解其他人、都有追求者，但倾耐咗之后都觉得唔啱倾，就冇了解落去，呢个（马国明）系了解咗一段时间先开始发展，觉得好啱。”有否计划将来？她笑话未有咁快：“都会似普通情侣咁倾吓将来，但唔会好认真讨论，哈哈！两个人都系朝住呢个方向嘅，之前都有讲如果搵到啱嘅人，都唔会瞒大家，自己都想一生一世，但佢系咪咁谂就唔知啦！”

靓汤获男友马国明大赞性格简单，她怕丑以五倍“回礼”，孝顺、善良、冷静、成熟及稳重，她说：“佢同我都好锡父母，有共同话题，三观又好似，我哋都好佛系，大家都咁宅，哈哈！佢好善良，我最锺意⋯有啲怕丑添！佢喺人哋面前同喺我面前系唔同，佢好冷静、成熟、稳重，好多嘢都可以安定我心灵，表面上我系一个傻大姐，但其实我系好腾鸡，佢畀到好多安全感我。”

父亲节将至，问到宣布恋情是否最佳父亲节礼物？靓汤继续甜笑：“我自己都有再买礼物。（会同双方家长庆祝？）咁就要睇吓就唔就到时间，但大家都有互买父亲节礼物，加上我妈咪就嚟生日，佢都好紧张咁问我妈咪锺意啲咩，反而系我叫佢唔使。（咁有诚意融入汤家？）佢上嚟我屋企都有买礼物、生果，好贴心，令人好锺意佢。”笑问家人当马国明半个女婿？她说：“我冇咁问呀！但都唔好咁讲住，容乜易以为我一定会⋯咁我咪冇矜持？哈哈！”

讲到好姊妹兼马国明旧爱黄心颖透过媒体祝福二人，问到靓汤可有跟心颖联络？靓汤变回认真Mode说：“多谢佢嘅祝福，但自佢旧年去咗美国之后，我哋都冇乜联络，都唔系太了解佢近况。（无论工作、男人都指你全部接收晒心颖，惊唔惊畀人讲闲话？）其实系缘分，我同佢一齐我都冇咁样计划，我哋都系最近先倾偈，两个都冇谂过咁。（如果见到心颖会尴尬？）暂时冇咁谂住，呢个唔答啦，都未发生。”​