噚間電影《壹獄壹世界‧高登闊少踎監日記》舉行首映活動,同王宗堯喺《導火新聞線》合作無間嘅周家怡、楊淇、梁小冰等都有出席,「方凝」周家怡被問到《導火》電影版進度嘅時候,佢就話:「今日可以正式講,應該9月底原班人馬開拍。」問到新戲係唔係會加周秀娜,同楊淇爭王宗堯,佢就話:「應該唔會喇,蕭生話應該唔會加Chilam同娜姐,唔知會唔會有仔比我呢?我想同編劇講將我轉返鍾意男仔。」
同場出現嘅周秀娜就話電影公司曾經同佢接洽,佢話:「有傾過,不過細節唔清楚,據我所知個角色都係做記者嘅,不過都係初步傾。」啱啱過咗生日嘅佢,被問到生日願望嘅時候,佢就話:「身體健康啦,個個女仔都祝我快啲搵到男朋友,自己唔係特別恨,因為心急唔嚟。生日食飯都係全女班,等佢哋介紹。條件就要高過我,因為有安全感啲,同埋唔可以太瘦,因為食生日飯食到肥咗。」
|