|
视后唐诗咏过往廿年一直工作,虽然令她获得一笔积蓄,现时无后顾之忧,能随心所欲,然而多年来压力积聚,她坦言现时即使停下来,但已七劳八损,多年来的虚耗令身体特别虚弱,要继续好好调理,不过她坦言幸而多年来一直有调整心理方面,不断提醒自己不要忽上忽落。离开无綫近年半的唐诗咏早前为HOY TV到英国多个城市拍摄旅游特辑,她不讳言拍此节目时有离奇无比的动力,而节目播出后,不少观众表示看到不一样的唐诗咏,更能从她的表情、举动感受到其喜乐及佻脱的一面。诗咏接受专访时坦言不少人都跟她这样说:“我谂系因为以前自己嘅谂法同依家好唔同,以前我会将所有谂法放喺工作上,而我又系一个好工作狂嘅人,对自己嘅要求会高,呢个系做演员必需要有嘅,但系如果能够拍完一套剧休息一阵再拍,咁先可以搵到平衡,我之前就系失去咗呢个Balance,过去20年我都不停工作,好少认真去生活,呢个系我依家开心咗嘅原因,呢段时间我先可以真真正正咁生活,其实同好多人一样,都系朝早起身,做吓自己想做嘅嘢,睇吓戏咁,因为你冇压力包围住,咁先可以令你真正放松到。”
诗咏于这一年时间亦发掘了不少兴趣,好似跑步、冥想、整面包等,令她发现原来做“学生”好幸福:“以前同大家交流都系讲吓最近拍紧乜嘢戏、放饭食啲乜咁,依家生活圈子扩大咗,喺兴趣班我认识咗好多唔同圈子、年纪嘅朋友,我哋倾偈话题已经唔系个角色点去演,而系个面包点样整先好食,开拓咗我另一个新天地。”已单身多时的她被问到有否结识到新对象或有想成家立室的谂头时,她说:“反而家庭呢方面我以前会谂多啲,依家我明白一个道理系自己先要了解自己,要懂得同自己相处、懂得爱自己,先至会有平衡、健康、开心嘅关系。爱情方面,我觉得搵到一个适合同我过下半生嘅人就已经好足够,最紧要三观啱,大家生活又协调,呢件系一件好开心嘅事,我都会一路期待住。”辛勤多年,亦令诗咏拥有一定积蓄,令她现时安心选择,没后顾之忧:“做咗咁多年,我都储咗一笔钱,买咗几多楼唔好讲,资产一定有,点解过往20年我要搬近公司,因为我一直希望可以用一段时间去努力,令我往后可以随心所欲。”
诗咏不讳言虽然离开娘家一年多,但都好怀念以往开工的点滴:“我成日都会同啲幕后食饭,佢哋都有讲拍摄上嘅嘢,呢样系我最挂住,好怀念以前拍一套剧3个月大家点样去努力,去谂场戏、点样拍好佢,呢啲都系我好挂住嘅!但亦都因为过往长时间咁样,庆幸依家生活同工作上搵到平衡,暂时觉得呢个平衡先系最重要。”说到多年来剧接剧挨坏了身子,免疫系统更一度出现问题,诗咏不讳言身体已七劳八损:“一停落嚟身体都会特别虚弱,虽然之前我都好努力调理身体,但虚耗太多,呢样嘢系好漫长,我觉得以前拍嘢我一路有调整心理,会提醒自己唔好忽上忽落,呢样反而好好彩。过去20年嘅压力都积累喺身体内,我终于明白点解有啲演员系两年拍一套,系真系有原因,依家要嘅唔系纯粹工作上带畀你嘅满足感,而系生活上嘅宁静。”问到无綫有否找她回巢拍剧?她谓:“其实我同公司关系一直好好,所以系仲有合作机会嘅,至于去边度拍先,呢啲缘分嚟就会嚟,我都不停睇好多唔同嘅剧集,希望可以同唔同人合作,擦出火花。”
|
|