|
艺人马德钟日前同囝囝马在骧喺屋企大打出手,而事件畀家中另一位成员迅速摆平,马德钟事后将当时嘅片段放上社交网并留言:“家庭大战之战场无父子,最后狗狗也加入了。”究竟发生了甚么事?片段开头由文字交代:“依家咁夜,阿爸一定瞓咗啦,今次一定冇事。”跟住就见到马在骧鬼鬼祟祟咁行出房门,随后身后传来一把好熟悉嘅声音讲:“依家几点啦?”镜头一转就见到漆黑中拎住把血红色激光剑的马德钟出现,囝囝见到咁嘅情况亦不敢怠慢,随即亮起佢把蓝色激光剑,电光火石之间两父子就打起上嚟,而喺双方胶着之际,真正嘅“Big Boss”隆重登场,原来系佢哋嘅爱犬Rocky,Rocky“大叫”咗句:“咁夜啦!仲嘈咩嘈?唔使瞓觉咩?眼瞓死啦!”Rocky出到“吼功”,两父子仲唔即刻乖乖收剑咩。其实成件事只系两仔爷夜麻麻瞓唔着,拍下片引大家笑啫,佢哋感情咁好,又点会打大交吖!
|
|