|
由视后林夏薇主演嘅电视剧《宠爱PetPet》,终于喺前晚(31日)首播,剧中饰演兽医“金惠婷”嘅佢,更同饰演“汪声仁”嘅周嘉洛大玩姊弟恋。虽然剧集播出前,有唔少网友担心2人年纪相差8年会有违和感,不过随着首集播出,淡妆上镜嘅林夏薇亦少女感十足,白滑粉嫩嘅肌肤同Fit到漏嘅苗条好身材,认真回春有术之馀,同周嘉洛搭配嘅“欢喜冤家”更笑料百出,首集播出就大获好评。
而剧中性格Mean到爆嘅林夏薇,更一改平日嘅温柔淑女形象,化身成“女汉子”嘅佢,更喺第一集已经有“动作戏”爬水渠,利落身手相当抢Fo。​随着剧集播出,林夏薇亦喺社交网晒一段花絮,并写道:“第一集金医生已经有动作戏。”只见林夏薇吊晒威也之馀双手更贴满白色胶布,引嚟唔少网友心痛以为女神拍剧受伤,好彩只系保护措施,而精彩又爆笑嘅演出亦引嚟唔少网友激赞外,仲有网友留言:“薇薇真系好劲,超勇敢!不如下次拍埋打戏!”、“第一集就变特技演员!”、“睇过你扮演警察律师...今次系医生,下次会唔会有幸见到你演消防员?一定好型好精彩!”
薇薇笑言对此印象深刻:“因为要喺几层楼高嘅外层爬,感觉好真实。最大难度系天气好炎热,仲要吊威吔着住好多层衫,当时有少少中暑嘅感觉,好彩现场嘅武指好贴心,见到我晕晕哋,就攞汽水畀我饮,好感动!其实我都好锺意吊威吔,但就冇乜机会拍打戏,对上一次已经系2013年嘅《寒山潜龙》。”谈到与嘉洛于剧中谱姊弟恋,薇薇笑言:“第一次同嘉洛合作,开头唔知对手系佢,后尾知道系佢之后即刻谂:‘吓,咁细个?得唔得㗎?’而现实中我就冇接触过姊弟恋,拍摄时同佢都有谂过大家点样夹会好啲,一开工就觉得默契几好,佢系一个好灵活嘅创作型艺人。”
|
|