|
“玉女掌门人”周慧敏以代言人身份出席健康品牌活动,现年55岁的她,逆龄有术,尤其一把乌发长发,散发仙气,但原来她曾受头发问题困扰:“可能年纪大咗,头发冇以前咁多,但食咗健康产品,发现生咗啲新头发出嚟,好开心。”
自言近期精神变好的她,有足够体力应付卖二手衫,今天(20号)第5轮二手衫在网上开卖,她说:“今天我着紧呢件白色连身裙都会卖嘅,二手衫啲相,都系我自己影,有啲就系着住件衫嘅相,所有范畴嘅嘢,我都有一手一脚去做,(之前收益有几多?)冇计喎,因为啲衫钱都捐晒去慈善机构。”
此外,她亦忙于回信给粉丝,指此习惯已多年,全部是亲笔信:“唔系覆email,我开咗个邮箱,真系每封信用笔写嘅,我仲自己入信封,贴邮票,我计过覆22封信,大约要5个钟啦,仲有一大叠未覆,同埋如要寄去内地,手续就繁复啲。”她又觉得覆粉丝信是种乐趣,尤其收到2000年后年青粉丝的来信:“佢哋话因为之前疫情,所以上网煲剧,就睇到神剧大时代,从而认识我,之后又听我啲歌,佢哋话好可惜出生时唔系我嗰个年代啰。”至于可收过“奇怪”来信?她直言情信等一概已读不回:“有啲会叫我咩啰。(老婆?)呢啲啦,其他好特别嘅就冇收过。”
同场的前无綫主播陈嘉倩亦着手搞网上二手衫生意:“多数都系我之前着过嘅主播衫,都好新净,都有几百件,全部塞晒入床下底,我仲会叫其他艺人畀二手衫我卖,收益扣除成本就捐畀慈善机构,做善事之馀又够环保。”问可有泳衣及内衣卖,她笑住谓:“我唔识游水,所以冇乜泳衣,内衣裤就卫生问题,唔会卖,不过我啲衫,全部都会洗乾净先拎出嚟卖,因为觉得唔会有人锺意我阵味啩。”
|
|