视后唔同命！山聪仔冧爆黐阿佘 对住胡定欣即黑晒面

etin

视帝陈山聪演技毋庸置疑，其囝囝Jaco同样系“性格演员”，畀面果阵笑晒口表情多多，唔畀面嘅话随时要硬食黑面，近日佢再展示“变脸”神技，新年期间山聪同多位圈中好友拜年，当中视后佘诗曼难得现身，即时恭喜山聪成为视帝，而Jaco亦似乎相当锺意阿佘，合照时主动贴到实，兼伸埋手仔手拖手，仲尴尴尬尬咁微微甜笑，明显对阿佘嗒晒糖。

但到另一日同样系视后嘅胡定欣向Jaco派利是时，Jaco就黑晒口面，不停转动定欣封利是，闷闷不乐咁嘅样，山聪问佢：“嫌封得少？”定欣即时撒娇：“好大封㗎啦！搵钱好辛苦㗎！你笑吓啦！”但Jaco照样懒理，当定欣问佢可唔可以锡面珠时，佢更即刻摇头，连畀面笑吓都唔肯，真系同人唔同命。其实Jaco向来对住定欣都会即时变咗“苦瓜乾”，定欣都惯晒咁表示：“3年啦！你对我的感情依然......冇变，我爱您 JACO！嫌弃利是封得少，爱的互动就系冇互动。”