陈山聪庆功饭食唔完 Crazy Runner聚头贺封帝

etin

艺人陈山聪早前于《万千星辉颁奖典礼2022》勇夺视帝，人缘甚好嘅佢庆祝活动不断，除早前与剧集《超能使者》一班演员设宴庆功外，佢再与Crazy Runner一班好友包括胡定欣、胡蓓蔚与老公单立文、袁伟豪与老婆张宝儿等饭敍，众人更送上两个大蛋糕，其中一个蛋糕印上视帝奖座及当日陈山聪封帝嘅照片，另一个蛋糕更有山聪卡通公仔，好有心思。张宝儿网晒大合照，并留言：“终于有机会齐聚恭喜陈山O荣获视帝！”陈山聪则开心答谢：“多谢家嫂！”

陈山聪接受访问表示：“好开心，尤其我哋呢班兄弟姊妹，喺呢10年入面佢哋都好支持我，大家都好似成为咗屋企人咁，所以我点都要抽时间同佢哋食呢餐饭。”佢又指原本今餐饭早已约好，现时攞奖可谓锦上添花：“其实本身呢餐系约食团年饭，咁啱撞正我又攞奖，所以就顺便安排呢啲庆祝活动，简简单单开开心心倾吓偈。”