郑俊弘情难自控变痴父 追多个顶唔住

etin

艺人郑俊弘（Fred）与何雁诗两年前拉埋天窗，至今年中喜获麟儿，一家三口幸福满泻。经过大半年Chur爆拍剧生活后，Fred终可宣告放假休息，把全部时间奉献家庭，他坦言现阶段有仔万事足：“望住佢好开心，心情同以前好唔同，个人亦开朗咗好多，唔单止我，太太同屋企人都系因为有呢个小朋友关系提升咗！”

​儿子获长辈们锡到燶，令Fred非常感恩，问到可有被催生多个？Fred笑说：“佢哋未，但我同太太都有计划，希望唔使等咁耐，首先系太太休息够身体准备好先。（想追仔定女？）初头想生女多个生仔，但系当个仔一出嚟就觉得好完美，乜嘢都冇所谓，如果第时生埋个女，我应该就死得，因为依家已经痴恋个仔，揽住佢，好爱佢。我一路走来都唔容易，不过经历过嘅嘢已经过去，呢一刻系最幸福。”

由于已有3年没返加拿大探父母，故计划年底举家飞当地，顺道四代同堂温馨过年：“爸爸妈妈由我哋结婚都未同佢哋食餐饭，个孙都未见到，所以点都要返去见啲长辈，畀个仔见吓太嫲。”而Fred于无綫新剧《轻．功》演中韩混血儿，乃一名功夫迷，与黎耀祥继《大太监》及《名门暗战》三度合作，Fred指他们相隔8年再聚头，剧中还不乏对手戏，故也有趁未埋位时请教凑仔经：“大个咗就够胆同祥哥倾偈，佢会讲吓人生、演戏，同上年喺内地发展嘅经历，所以对佢了解深入咗！”​