Twins成军21周年 阿Sa阿娇激动相拥即作呕

etin

​组合Twins唔经唔觉已经成军21周年，昨日（18日）凌晨蔡卓妍（阿Sa）就率先晒出同锺欣潼（阿娇）头贴头靓女Selfie作回礼，庆祝21年姐妹情。而佢哋个Channel“Twins TV”都搞搞新意思，搵佢哋两个做默契快问快答，当中就问到Twins多个第一次，好似出碟日期、红馆骚等，大部分题目都系阿Sa抢先答，阿娇就喺旁边点头认同，佢自己都直认答案全中嘅功劳都系归于阿Sa，够晒诚实。

依家为人气音乐竞赛节目《乘风破浪》积极备战嘅二人，拍住上对撼韩团少女时代的前成员Jessica （郑秀妍），估唔到两位好姐妹竟然要“反目”，喺庆祝成团21周年嘅庆祝片入面，佢两个扮锡锡时竟然毫无默契，之后嗌佢哋揽揽仲相拥到扮作呕，非常搞笑。

而二人嘅好友、《浪姐》“师姐”杨丞琳就拉埋王心凌一齐见面，咁啱杨丞琳就同阿Sa衣着有8成似，即被网友笑佢两个嘅默契仲好过Twins，睇嚟阿娇地位岌岌可危，随时畀杨丞琳取代。而经理人霍汶希亦在社交平台上载多张旧照，并为2人参加《乘》鼓励加油，写下“重新起航，勇敢接受挑战，每天都是满满的活力！永远做你们坚强的后盾！”