家姐疑虐畜放猫入洗衣机 黄嘉雯力斥：佢今次的确唔啱

etin

前港姐冠军黄嘉雯几经辛苦上月终圆梦加入剧组，有工开嘅佢本来以为今年开咗个好头，点知前晚就有网友踢爆黄嘉雯家姐Yuki疑似甫放爱猫入洗衣机嘅片上社交网，即引嚟网上各大动物组织嘅关注，晒片嘅主人更被丧插虐畜！

片段中女主人称猫咪自己跳入洗衣机，但点知女主人就称爱猫随处便溺，所以要顺势惩罚佢，继而开启洗衣机兼闩埋洗衣机盖，只见猫咪在密封嘅洗衣机滚筒上被转动，受惊嘅猫咪更跳起欲逃离，情况非常危险！

开机近14秒后，女主人先施施然打开洗衣机盖，吓到猫咪立刻跳出，片段终结。而女主人更在限时动态中写上“受惊的小肥妹”并配上三个小丑笑脸。

大批网民睇到短片后即大闹，部分激进网民及爱护动物人士对此非常愤怒，声讨要求捉拿该女子及指佢变态及残酷对待动物。根据香港法例第169章《防止残酷对待动物条例》第3条，残酷对待动物的最高刑罚为罚款20万元及监禁3年。

有网民人肉起底女主人，虽然女主人帐号为私人帐号，但仍有网民发现指女主人疑似系黄嘉雯家姐Yuki，网民称黄嘉雯与该女主人社交网帐号互相Follow，黄嘉雯更曾上载与对方嘅合照及Tag对方ID，更搵到当年女主人社交网发文叫网友投票支持黄嘉雯竞选港姐嘅活动。

加上网民翻查当年黄嘉雯当选时接受访问嘅片段，亦曾带Yuki上镜现身，Yuki与女主人上载过嘅自拍照相似，令网友更确信女主人就系Yuki

电话联络黄嘉雯，佢承认家姐Yuki系有只猫叫肥妹，问到佢知唔知道家姐将只猫放入洗衣机？黄嘉雯表示自己啱啱起身，唔清楚事件，并言：“佢不嬲都好锡佢只猫㗎喎！我都系今朝早先知道呢件事，其实佢不嬲都好锡啲小动物，不过佢今次咁做的确唔啱同处理得唔好，但我相信佢唔会再有呢啲事情发生。”​。