艺人林雅诗(Grace)日前被爆男友马天乐疑出轨,嗒女助手兼育有一子,之后就一直“潜水”,事隔一个星期她为健康用品拍摄宣传片首度现身,而身兼经理人一职的马天乐未有在场,见Grace全程面无表情、非常憔悴,左手前臂缠有黑色压力绷带,更意外露出3条透明长胶布及红色血痕,无论在影相、拎咪做访问时都刻意遮手,行为相当可疑!
甫受访问到现时心情如何?她淡言谓:“有嘢做系好啲嘅,但好难过、好辛苦,觉得自己有情绪,喺心目中发生咗件几大嘅事,好嬲,毕竟都三年。”她再讲因为一早已应承好友参与拍摄工作,故不想影响大家,要做个专业的艺人,不过就坦言真心未Ready开工。
问到现时跟马天乐的关系?她无奈说:“唔知咩关系。(佢仲系你经理人?今日唔见佢。)依家自己接,分开先。(有联络?)一定有,工作上都要沟通,不过都系嗌霎,未接受到呢件事,自己心情、身体都出现状况,仲未解决。”并自爆已三日冇食、冇瞓,心情极差,追问身体出现状况是否因而入院?Grace停顿数秒后承认有入院:“系去睇医生。(因为闹交有肢体碰撞?)冇发生,唔关佢事。(但有人见到你哋喺医院再嘈?)冇,但佢系有陪我去睇医生。(因咩事睇医生?)系我自己唔小心扭亲。(呢个伤系点扭亲?)系我发脾气唔觉意撞到。(佢好紧张你整亲?)都会。”
期间Grace再多次停顿及叹气,更数度爆喊,心情难以平伏,特别问到有否做傻事时,她明显避谈,低头不语,再突然声泪俱下:“佢哋好担心我,明明姐(郑明明)留言话同我祈祷,所有人都好担心我,但依家我要处理好自己先,晚晚食安眠药都瞓唔到!”她又自认情路坎坷:“前夫系咁,到呢个都系咁,嬲到想打自己!佢哋咁耐都发现唔到!(对爱情失去信心?)一定,依家暂时唔会谂感情。(对马天乐死心?)我会好死心,我过唔到自己嗰关,佢有道歉,但我接受唔到。” ​ 重提马天乐偷食事,Grace激动再喊,多次呻自己好蠢,全因太信任对方:“佢同我解释系同我嘈完交就搵助手倾诉,女人埋到嚟,男人点会唔咸湿?佢承认把持唔住一次,但一次就有小朋友咁犀利?仲话嗰次之后冇联络,我真系唔信。(但依家话个小朋友唔系佢?)我有问佢有冇验DNA,佢话乜都冇,所以成件事都好𢱑爆头,我只系知道呢刻个女助手仲系好锺意佢,但佢又祝我幸福快乐。”会否抽身了结三角关系?她哭说:“我谂咁样系咪啱啲?成全佢一家人,我知道佢哋仲有一齐,依家大家都唔开心,我用工作麻醉自己。”
|